Այսօր ամենայն հայոց բանաստեղծ Հովհաննես Թումանյանի ծննդյան օրն է

Փետրվարի 19-ը հայ մշակութային կյանքում առանձնահատուկ նշանակություն ունեցող օր է։ Այս օրը ծնվել է Հովհաննես Թումանյան՝ Ամենայն Հայոց բանաստեղծը, որի ստեղծագործությունները մինչ օրս շարունակում են սիրվել թե՛ մեծերի, թե՛ փոքրերի կողմից։ Նրա հեքիաթները, պոեմներն ու բանաստեղծությունները դարձել են հայ գրականության անբաժանելի մասը և ազգային ինքնության կարևոր բաղադրիչ։

2008 թվականից ի վեր փետրվարի 19-ը Հայաստանում նշվում է նաև որպես Գիրք նվիրելու օր։ Օրվա խորհուրդը գրքի և ընթերցանության կարևորության ընդգծումն է, ինչպես նաև գրքի հանդեպ սեր սերմանելը հատկապես երիտասարդ սերնդի շրջանում։ Այդ օրը կազմակերպվում են գրական միջոցառումներ, հանդիպումներ գրողների հետ, գրքի շնորհանդեսներ և ընթերցումներ։

Գիրք նվիրելու օրը լավ առիթ է ոչ միայն հիշելու Հովհաննես Թումանյանի գրական ժառանգությունը, այլև միմյանց գրքեր նվիրելով՝ տարածելու գիտելիք, ջերմություն և մշակութային արժեքներ։