ԱԺ-ում խոշոր հարկատուների նկատմամբ պարտադիր աուդիտը հանելու օրինագծի շուրջ քննարկումների ժամանակ ԱԺ ՀԱԿ խմբակցության ղեկավար Լևոն Զուրաբյանն իշխանությանը կոչ արեց խաղալ բաց քարտերով:
Իր ելույթի սկզբում նա դժգոհությունը հայտնեց ԱԺ նախագահ Գալուստ Սահակյանին, որ արտահերթ նիստում անավարտ մնացած հարցը տեղափոխվել է հերթական նիստ, և ինքը տեղյակ չի եղել։ Զուրաբյանի խոսքով` աուդիտի նշանակությունը մեր երկրի համար հսկայական է, քանի որ միջազգային փորձը հուշում է, որ այն երկրներն են զարգանում, որտեղ ձեռնարկությունների հսկողությունը գտնվում է հանրային վերահսկողության ներքո։
ՀԱԿ խմբակցության ղեկավարն ընդգծեց, որ ՀՀ-ում կորպորատիվ իրավունքը լիարժեք չի գործում. չունենք ձևավորված ինստիտուտներ և ընկերություններ:
«Ուստի՝ ՀՀ պայմաններում կարևոր նշանակություն է ստանում պարտադիր աուդիտը, որը ստեղծում էր որոշակի հիմքեր այդ բիզնեսները հանրային վերահսկողության տակ պահելու համար: Հանուն արդարության՝ պետք է նշենք, որ ՀՀ-ում ամեն ինչ աղճատվում է, և Տիգրան Սարգսյանի կողմից առաջ քաշված այդ օրենքն առաջին հերթին շուկա բացեց նրա հետ կապված ֆինանսիստների համար։ Սակայն մենաշնորհը զգալի չէր և թույլ տվեց զարգանալ նաև այլ ընկերությունների»,- ընդգծեց Լ. Զուրաբյանը։
Նրա խոսքով՝ կառավարությունը պարտադիր աուդիտի պահանջը հանելու այս նախաձեռնությամբ ցանկանում է հասնել երեք նպատակրի։
«Առաջին նպատակն է՝ մեծահարուստներին ազատել ավելորդ բեռից։ Երկրորդ նպատակը՝ ջախջախել նախկին վարչապետ Տիգրան Սարգսյանի ազդեցությունը ֆինանսական աշխարհում», – նշեց խմբակցության ղեկավարը, հավելելով, թե երրորդ նպատակով կառավարությունը ցանկանում է նախապատրաստել աուդիտի կլանումը ֆինանսների նախարարության կողմից։
.gif)
