ԱԺ պատգամավոր Նիկոլ Փաշինյանի երեկվա վրդովմունքը` կապված «Ռուսաստանն այսօր» պետական լրատվական գործակալության գլխավոր տնօրեն Դմիտրի Կիսիլյևի վիճահարույց հայտարարությունների հետ, իհարկե, միանգամայն հասկանալի և ընդունելի է բոլորի, անգամ` հանրապետականների համար: Թեև նրանք դա ի ցույց դնելու համարձակություն, բնականաբար, չունեցան: Սակայն Փաշինյանի առաջարկը` Կիսիլևին «պերսոնա նոն գրադա»` անցանկալի անձ հայտարարելու մասին, կարծում ենք` չափազանց է: Ինչպես ԱԳՆ մամլո խոսնակ Տիգրան Բալայանն էր պարզաբանել. «Պերսոնա նոն-գրադա» Հայաստանում հայտարարվում են այն անձինք, որոնց գործունեությունը վնաս է մեր ազգային և պետական շահերին»:
Անկեղծ ասած` դժվար է համոզիչ փաստարկներ բերել առ այն, որ Կիսիլևի՝ նախօրեին արած հայտարարությունները որևէ կերպ վնասում են մեր պետական և ազգային շահերին: Նկատի առնելով այն հանգամանքը, որ Հայաստանի՝ վերջին քսան տարիների իշխանությունները մեր պետական և ազգային շահերը կամավոր կերպով և, ցավոք, կարծես թե անվերադարձ, հանձնել են Ռուսաստանի տնօրինմանը: Ուստի պետք չէ զարմանալ, որ Կրեմլի ոչ պաշտոնական խոսնակը Հայաստանի Ազգային ժողովում իրեն կարող է նման լկտի, և, ինչպես շատ տեղին ստուգաբանությամբ նկատեց Ալ. Արզումանյանը, ցինիկ պահվածք թույլ տալ:
ԱԺ պատգամավորները լավ կանեին Կիսիլևի խոսքերից վրդովվելուց բացի, կամ դրանից շատ առաջ` վրդովվեին ԱԺ-ում հայ-ռուսական խորհրդարանական ակումբի բացման փաստից ( երբ չկան հայ-ամերիկյան կամ հայ- ֆրանսիական ակումբներ), այն էլ` մի մարդու նախաձեռնությամբ, ով հայտնի է Հայաստանում տխրահռչակ պուտինյան ակումբների բացմամբ: Աժ պատգամավորները նախ և առաջ պետք է մտահոգվեին, թե ինչու և որ արժանիքների համար են Աժ նախագահը, պաշտպանության նախարարը և այլք այդ մարդուն մեդալներ և կոչումներ շնորհում: Եթե շնորհում են` ուրեմն հօգուտ մեր պետական շահի ինչ-որ բան է արել: Եթե այդ ինչ-որ բանը նշված ակումբի բացումն է, որտեղ կիսիլևանմաններն ու վոլինկինները նման հայտարարություններ են անում, նշանակում է՝ մեր իշխանությունների պատկերացմամբ` դա հօգուտ մեր ազգային շահի է:
Հետևաբար` նախքան Կիսիլևին «պերսոնա նոն գրադա» հայտարարելը, պետք է այդ կարգավիճակը տալ Հայաստանի իշխանություններին, որոնց անմիջական ջանքերի արդյունքում, ի դեպ, հայերի գերակշիռ մասի համար այսօր արդեն հենց ռուսաց լեզուն ունի մայրենիի կարգավիճակ, քանզի ինչպես մի առիթով հեգնեց Վլ. Պուտինը` Ռուսաստանում ավելի շատ հայ կա, քան Հայաստանում:
.gif)
