ՀԱՐՑ. Խնդրում եմ ասել, թե Երեւանի շենքերի բակերի քանի կամարներ (դալաններ) են ներկվել  եւ նկարազարդվել, ու դեռ քանիսն է նախատեսվում ներկել:

ՊԱՏԱՍԽԱՆ. Ի պատասխան Երեւանի քաղաքապետարանին ուղղված Ալլա Համբարձումյանի հարցման՝ տեղեկացնում ենք, որ Երեւանի կամարանցումների նկարազարդման աշխատանքները սկսվել են 2011 թվականի սեպտեմբեր ամսից: Նշենք, որ 2011թ. նկարազարդվել է 14 կամարանցում, 2012թ. առաջին փուլով՝ 58, իսկ երկրորդ փուլով՝ 60 կամարանցում: Դրանց գունազարդման աշխատանքները դեռ շարունակվում են, ավարտվելու են հոկտեմբերի 14-ին՝ կապված Էրեբունի-Երեւանի 2794-ամյակի տոնակատարությունների հետ:

«ԺՈՂՈՎՈՒՐԴ». Մեր առօրյայում այնքան քիչ են տեսանելի եւ շոշափելի առաջընթացները, որ քաղաքակիրթ երկրներում ամենասովորական երեւույթ համարվող՝ շենքերի եւ շինությունների ձեւավորումը մեզ ակնառու կերպով զարմացնում է: Ու քաղաքացին փորձում է իր հարցի ենթատեքստում հասկանալ՝ դրանք հերթական նախընտրական աչքակապություններ են, թե քաղաքային իշխանությունների կողմից Երեւանը բարեկարգ դարձնելու ծրագիր: