Ապրիլի 10-ին ԼՂՀ ռազմագերիների, պատանդների և անհայտ կորածների հարցերով զբաղվող պետական հանձնաժողովը՝ համաձայն Կարմիր խաչի միջազգային կոմիտեի և ԵԱՀԿ գործող նախագահի անձնական ներկայացուցչի գրասենյակի միջնորդությամբ Բաշ Քարվենդ բնակավայրի մոտակայքում իրականացրել է դիակների փոխանակում։
Ինչպես «Արցախպրես»-ի հետ զրույցում նշեց ԼՂՀ ռազմագերիների, պատանդների և անհայտ կորածների հարցերով զբաղվող պետական հանձնաժողովի նախագահ Վիկտոր Քոչարյանն, Ադրբեջանի կողմից ապրիլի 1-ի լույս 2-ի գիշերը ռազմական գործողությունների վերսկսման հետևանքով ապրիլի 5-ի դրությամբ հայկական կողմից անհայտ կորած էր համարվում 19 հոգի:
«Այսօր Բաշ Քարվենդ բնակավայրի մոտակայքում հայկական կողմին փոխանցվել է 18 զոհվածի մարմին: Դեռևս անհայտ է մնում մեկ զինվորականի ճակատագիր»,- ասել է Քոչարյանը՝ հավելելով, որ Կարմիր խաչի միջազգային կոմիտեի հետ աշխատանքներ են տարվում, որպեսզի այդ զինվորականի մասին տեղեկություններ ստանան:
ԼՂՀ ռազմագերիների, պատանդների և անհայտ կորածների հարցերով զբաղվող պետական հանձնաժողովի նախագահի խոսքով, վերադարձված բոլոր զոհվածների մարմիններն արդեն ճանաչվել են հարազատների կողմից:
.gif)
