Հոկտեմբերի 13-ին ԵԱՀԿ Մշտական Խորհրդի հերթական հանդիպմանը Ժողովրդավարական հաստատությունների և մարդու իրավունքների գրասենյակի (ԺՀՄԻԳ) գործունեության մասին ելույթով հանդես եկավ ԺՀՄԻԳ տնօրեն Միխայել Գեորգ Լինկը:
Հայաստանի առաքելության ղեկավար, դեսպան Արման Կիրակոսյանն իր պատասխան հայտարարության մեջ ուշադրություն հրավիրեց ԺՀՄԻԳ տնօրեն Լինկի Բաքու կատարած այցի և նրան վերագրվող հայտարարությունների ու գնահատականների մասին ադրբեջանական ԶԼՄ-ներում հրապարակված տեղեկատվության վրա: Նա նշեց, որ նման գնահատականների թվում է Ադրբեջանը՝ որպես միջկրոնական հարաբերությունների գերազանց օրինակ ներկայացնելը, ինչպես նաև այդ երկրում անցկացված սահմանադրական բարեփոխումների հանրաքվեին դրական լույսի ներքո անդրադարձը: Այդ առնչությամբ դեսպան Կիրակոսյանը մտահոգություն հայտնեց, որ ԺՀՄԻԳ տնօրենը դարձել է ադրբեջանական քարոզչամեքենայի գործիք:
Հայաստանի առաքելության ղեկավարն ընդգծեց, որ հանդուրժողականության և ոչ խտրականության թեմայով Բաքվում ԺՀՄԻԳ-ի միջոցառման անցկացումը կառույցի տնօրենի մակարդակով և Ադրբեջանում գոյություն չունեցող դրական օրինակների գովաբանումը բացասաբար կանդրադառնա ԺՀՄԻԳ հեղինակության և վարկանիշի վրա՝ որպես մի հաստատություն, որը կոչված է նպաստել մարդու իրավունքների և հիմնարար ազատությունների պաշտպանությանը: Այդ համատեքստում Արման Կիրակոսյանը շեշտեց, որ Ադրբեջանը պաշտոնապես վարում է այլատյացության հողի վրա հանցանքների և անհանդուրժողականության քաղաքականություն:
.gif)
