ԼՈՒՐ ԿԱԴՐ

Լուսանկարն արվել է Կառավարության շենքի դիմաց

«Նաիրիտ» գործարանի աշխատակիցները երեկ նորից կառավարության շենքի դիմաց էին: Նրանք հավաքվել եւ պահանջում էին վերագործարկել «Նաիրիտ»-ը: Նաիրիտցիները կառավարության շենքի մոտից երթով շարժվեցին դեպի ՀՀ էկոնոմիկայի նախարարություն՝ իրենց բողոքը նաեւ այնտեղ հայտնելու համար:

 
ՀԱՐՑ. Ես ուզում եմ իմանալ, թե ո՞ր դեպքում է հնարավոր բուհի ընդունելության քննությունների ժամանակ հայոց լեզվի փոխարեն քննությունը հանձնել այլ լեզվով:

Լուիզա Իսախանյան (30 տարեկան, տնային տնտեսուհի)

ՊԱՏԱՍԽԱՆ. Լ. Իսախանյանի հարցին ի պատասխան՝ հայտնում ենք, որ միջնակարգ կրթության ատեստատում կամ համապատասխան ավարտական փաստաթղթում հայոց լեզվից եւ գրականությունից գնահատական չունեցող դիմորդները հայոց լեզվի (գրավոր) քննության փոխարեն կարող են քննություն հանձնել ռուսաց լեզվից (գրավոր), իսկ ռուսաց լեզվից եւ գրականությունից գնահատական չունեցողները՝ որեւէ օտար լեզվից՝ գրավոր (անգլերեն, ֆրանսերեն, գերմաներեն, իսպաներեն, իտալերեն):

Հայաստանի Հանրապետության սփյուռքի նախարարություն

«ԺՈՂՈՎՈՒՐԴ». Տեղեկացնենք, որ պաշտոնական տվյալներով 2009թ. պետական դպրոցները եղել են 1404-ը, իսկ 2015թ. դրանց թիվը կազմել է 1391: Դպրոցներից 453-ը հիմնական են, 109-ը՝ ավագ, 17-ը՝ վարժարան, 811-ը՝ միջնակարգ: 2009թ. դպրոց հաճախել է 386.954 աշակերտ, իսկ 2014-ին աշակերտների թիվը նվազել է՝ կազմելով 352.029:

 
ՀԱՐՑ. Խնդրում եմ ասեք՝ ի՞նչ իրավական ակտերով է առաջնորդվում բժշկասոցիալական փորձաքննական մարմինը, երբ անձին հաշմանդամության կարգ է սահմանում: Եվ կցանկանայի իմանալ, եթե անձը ՀՀ քաղաքացի է, սակայն հաշվառում չունի, ապա նման դեպքերում ի՞նչ կարգով է իրականացվում նրա բժշկասոցիալական փորձաքննության գործընթացը:

Հայկուհի Գասպարյան (52 տարեկան, տնային տնտեսուհի)

ՊԱՏԱՍԽԱՆ. Հ. Գասպարյանի հարցին ի պատասխան՝ տեղեկացնում ենք, որ բժշկասոցիալական փորձաքննական մարմինները անձին հաշմանդամ են ճանաչում համաձայն Հայաստանի Հանրապետության կառավարության 2006 թվականի մարտի 2-ի «Բժշկասոցիալական փորձաքննության իրականացման կարգը հաստատելու մասին» N 276-Ն որոշման եւ ՀՀ կառավարության 2003 թվականի հունիսի 13-ի «Բժշկաuոցիալական փորձաքննության ժամանակ oգտագործվող դասակարգիչները եւ հաշմանդամության խմբերի սահմանման չափանիշները հաստատելու մասին» N 780-Ն որոշման դրույթների:
Հաշվառում չունեցող անձինք կարող են ենթարկվել բժշկասոցիալական փորձաքննության՝ ներկայացնելով տեղեկանք փաստացի բնակության վայրից: Օտարերկրյա պետության քաղաքացիները Հայաստանի Հանրապետությունում կարող են անցնել բժշկասոցիալական փորձաքննություն, եթե տվյալ պետության հետ Հայաստանի Հանրապետությունն ունի համապատասխան միջպետական պայմանագիր:

Կենսաթոշակային համակարգի իրազեկման կենտրոն

«ԺՈՂՈՎՈՒՐԴ». Տեղեկացնենք, որ հաշմադամի վերափորձաքննությունը կատարվում է հաշմանդամության խմբի կամ «հաշմանդամ երեխա» կարգավիճակի համար սահմանված ժամկետը լրանալու, նրա առողջական վիճակը վատթարանալու, նրա՝ բժշկասոցիալական փորձաքննության որոշման համար հիմք հանդիսացող փաստաթղթերում կեղծիք հայտնաբերվելու դեպքերում, ինչպես նաեւ նրա (նրա օրինական ներկայացուցչի) դիմումի համաձայն կամ դատարանի որոշմամբ: