ԼՈՒՐ ԿԱԴՐ

Լուսանկարն արվել է Մաշտոցի պողոտայում

Չնայած ամանորյա տոներն անցյալում են, սակայն մայրաքաղաքը դեռ չի թոթափվել տոնական զարդարանքներից: Հունվարի 31-ի դրությամբ մայրաքաղաքում տիրում էր տոնական տրամադրություն. Մաշտոցի պողոտան լի էր լուսային զարդարանքներով: Երեկ նոր միայն քաղաքապետարանն անցել էր իր պարտականություններին՝ հավաքելով ամանորյա լույսերը:

 
ՀԱՐՑ. Քույրս չունի ՀՀ քաղաքացիություն: Կացության կարգավիճակ ստանալու համար դիմում է ներկայացրել, սակայն մերժում է ստացել: Խնդրում եմ ասեք՝ ե՞րբ նա կարող է կրկին դիմել՝ կացության կարգավիճակ ստանալու համար: Եվ ուզում եմ իմանալ՝ նա բողոքարկելու հնարավորություն ունի՞, թե՞ ոչ:

Աննա Մանուկյան (57 տարեկան, տնային տնտեսուհի)

ՊԱՏԱՍԽԱՆ. Ա. Մանուկյանի հարցին ի պատասխան՝ տեղեկացնում ենք, որ բացառությամբ հատուկ կացության կարգավիճակի, կացության կարգավիճակ ստանալու կամ երկարաձգելու համար ներկայացված դիմումի մերժումը օտարերկրացին կարող է բողոքարկել դատական կարգով: Կացության կարգավիճակ տալը մերժելու դեպքում օտարերկրացին մեկ տարի հետո կրկին կարող է դիմել կացության կարգավիճակ ստանալու համար:

Հայաստանի Հանրապետության սփյուռքի նախարարություն

«ԺՈՂՈՎՈՒՐԴ». Նշենք, որ օտարերկրացուն կացության կարգավիճակ չտրամադրելու համար կարող է հիմք հանդիսանալ օրինակ՝ եթե նա արտաքսվել է ՀՀ տարածքից կամ նախկինում զրկվել է կացության կարգավիճակից (եւ եթե արտաքսման կամ կացության կարգավիճակից զրկելու մասին որոշումից անցել է 3 տարուց պակաս ժամկետ), կամ նա դատապարտվել է ՀՀ-ում ծանր կամ առանձնապես ծանր հանցագործություն կատարելու համար:

ՀԱՐՑ. Նախկինում հաշմանդամը վերափորձաքննություն անցնելու համար դիմում էր բժշկասոցիալական փորձաքննության մարմին: Հիմա լսել եմ, որ նոր կարգ է սահմանվել, եւ կատարվել են որոշակի փոփոխություններ: Խնդրում եմ մի փոքր մանրամասնել, թե այս դեպքում ում պետք է դիմի քաղաքացին եւ ինչ փաստաթղթեր ներկայացնի: Ուզում եմ ծանոթանալ նոր կարգի մանրամասներին:

Լիաննա Խաչատրյան (51 տարեկան, տնային տնտեսուհի)

ՊԱՏԱՍԽԱՆ. Քաղաքացի Լիաննա Խաչատրյանի հարցի հետ կապված տեղեկացնում ենք, որ բժշկասոցիալական փորձաքննության ոլորտում նախատեսվում են մի շարք բարեփոխումներ, մշակվում են իրավական ակտերի նախագծեր, սակայն ոլորտը կանոնակարգող իրավական ակտերում դեռեւս փոփոխություններ չեն կատարվել, եւ ներկայումս բժշկասոցիալական փորձաքննություն իրականացվում է Հայաստանի Հանրապետությունում գործող հաշմանդամության սահմանման կարգի եւ չափորոշիչների հիման վրա (Հայաստանի Հանրապետության կառավարության 13.06.2003 թվականի «Բժշկասոցիալական փորձաքննության չափորոշիչները հաստատելու մասին» N 780-Ն որոշում, ՀՀ կառավարության 2006 թվականի մարտի 2-ի «Բժշկասոցիալական փորձաքննության իրականացման կարգը հաստատելու մասին» թիվ 276-Ն որոշում):

ՀՀ աշխատանքի եւ սոցիալական հարցերի նախարարության հասարակայնության հետ կապերի բաժին

«ԺՈՂՈՎՈՒՐԴ». Ավելացնենք, որ 2016թ. նոյեմբերի 30-ի դրությամբ հաշմանդամների հաշվառման հանրապետական շտեմարանում հաշվառվել է 204.770 հաշմանդամություն ունեցող անձ, որից 8.147-ը՝ (3.9%) հաշմանդամ երեխա: ՀՀ ԲՍՓ գործակալության տարածքային մարմիններում նոյեմբերին փորձաքննվել է 7.217 անձ, որոնցից հաշմանդամ է ճանաչվել 6.842 անձ: Առաջին անգամ 1.655 փորձաքննվածներից հաշմանդամություն է սահմանվել 1.456 անձի: Վերափորձաքննվել է 5.562 անձ, որոնցից հաշմանդամ է ճանաչվել 5.386-ը: Գործակալության վերափորձաքննության բաժնում վերափորձաքննվել է 361 անձ, որոնցից բողոքարկման կարգով՝ 33-ը (որոշում չի փոխվել), խորհրդատվական կարգով՝ 304-ը, հսկողական կարգով` 24-ը (փոխվել է 3 որոշում):