«Սասնա ծռեր» խմբի 18 անդամի մասով գործն ուղարկվել է Էրեբունի և Նուբարաշեն վարչական շրջանների ընդհանուր իրավասության դատարան և մակագրվել նույն դատարանի դատավոր Արտուշ Գաբրիելյանին:
Արտուշ Գաբրիելյանը 1999 թվականից մինչև 2003 թվականն աշխատել է Շենգավիթ համայնքի առաջին ատյանի դատարանի դատավորի օգնականի պաշտոնում։ Իսկ 2003 թվականից մինչ օրս Էրեբունի և Նուբարաշեն վարչական շրջանների ընդհանուր իրավասության դատարանի դատավոր է:
Հայտնի է, որ իրենց պաշտոնավարման ընթացքում դատավորները կարողանում են մեծ ունեցվածքներ կուտակել: ArmLur.am-ն ուսումնասիրել է դատավորի և նրա կնոջ հայտարարագրերը, որոնք նրանք ներկայացրել են Բարձրաստիճան պաշտոնատար անձանց էթիկայի հանձնաժողով:
Չնայած հենց Գաբրիելյանի դեպքում տվյալներն այնքան էլ առատ չեն, սակայն նրա կնոջ հայտարարագիրն իսկապես ուշադրության արժանի է: Նախ նշենք, որ 2016 թվականի հայտարարագրի համաձայն, Գաբրիելյանը վաստակել է 7 մլն դրամից ավել գումար, իսկ այդ պահին դրամական միջոցները կազմել են 10 մլն դրամ և 55 հազար դոլար:
Իսկ նրա կնոջ` Լիլիթ Գաբրիելյանի հայտարարագիրն ուսումնասիրելիս տեսնում ենք, որ նա տարիներ շարունակ մեծ գումարներ է նվեր ստացել: Օրինակ, 2011 թվականին այդ գումարը կազմել է 15 հազար դոլար. 2012-ին` 2000 դոլար, իսկ 2014-ին 10 հազար դոլար: Նախորդ տարի էլ Լիլիթ Գաբրիելյանը շահաբաժնից 5 մլն դրամ եկամուտ է ստացել, իսկ դրամական միջոցները կազմել են 5 հազար դոլար և 20 մլն դրամ:
.gif)
