Թող շարունակեն քննադատել, Աստված իրենց հետ. Սունդուկյան թատրոնի շուրջ առաջացած աղմուկի հետքերով

«Թող շարունակեն քննադատել, Աստված իրենց հետ, ես ավելացնելու բան չունեմ այս թեմայի շուրջ, դա որեւէ կապ չունի Սունդուկյան թատրոնի հետ: Մարդիկ են՝ սխալվել են, դիմել ենք, ասել ենք՝ հանեք, հանել են, եւ հենց քննադատությունների համար էլ հանդես եկանք հայտարարությամբ»: Այս մասին ArmLur.am-ի հետ զրույցում նշեց Գ. Սունդուկյանի ազգային ակադեմիական թատրոնի տնօրեն Վարդան Մկրտչյանը՝ անդրադառնալով թատրոնի պաստառներից մեկը շուրջ առաջացած աղմուկին:

Նշենք, որ արդեն մի քանի օր է, ինչ համացանցում տարածվում ու քննադատության է ենթարկվում Գ. Սունդուկյանի ազգային ակադեմիական թատրոնի պաստառներից մեկը, որում պատկերված են մերկ դերասաններ, եւ նրանց մարմնի որոշ հատվածներ ծածկված են լավաշով:

Հավելենք, որ հանրության քննադատությունների ահռելի ֆոնին Սունդուկյան թատրոնը հանդես էր եկել հայտարարությամբ. «Հունիսի 7-ին համացանցում տարածվող գովազդային պաստառի կապակցությամբ հարկ ենք համարում մանրամասնել․ա) Քննարկվող ներկայացումը, իհարկե, Գաբրիել Սունդուկյանի անվան ազգային ակադեմիական թատրոնի խաղացանկի հետ որևէ առնչություն չունի (կարող եք ծանոթանալ մեր խաղացանկին https://www.facebook.com/sundukyantheatre/posts/2166651256834677 )։

բ) Երբ պայմանագրային հիմունքներով թատրոնում տեղի են ունենում այլ թատերախմբերի կամ ստենդափային ներկայացումներ, դրանց համառոտ նկարագրերը և գովազդային պաստառները համաձայնեցվում են թատրոնի հետ։ Սակայն տվյալ ներկայացման կազմակերպման շուրջ բանակցությունները չեն հասել պայմանագրի կնքման փուլին, հետևաբար պաստառի էսքիզը չի ներկայացվել և չի ստացել թատրոնի համաձայնությունը»:

Լիդա Եղիազարյան