ԼՈՒՐ ԿԱԴՐ 

Լուսանկարն արվել է Սեւան-Գոմաձոր ավտոճանապարհին

Սեւան-Գոմաձոր ավտոճանապարհի 1-ին կմ հատվածում բախվել են Mazda 6 եւ VAZ 21110 մակնիշի ավտոմեքենաները։ Բախման հետեւանքով Mazda-ն գլխիվայր շրջվել է, 2 հոգի մարմնական վնասվածքներով տեղափոխվել են «Սեւան» բժշկական կենտրոն։ Բարեբախտաբար, տուժածներ չկան:

ՍՈՑԻԱԼԱԿԱՆ

ՀԱՐՑ. Ե՞րբ, որտե՞ղ եւ ի՞նչ փաստաթղթեր են ներկայացվում նոտարական թարգմանության որակավորմանը մասնակցելու համար:

Գոհար Գալստյան (31 տարեկան)

ՊԱՏԱՍԽԱՆ. Հայտարարության մեջ նշված ժամկետում ՀՀ արդարադատության նախարարություն են ներկայացվում՝

– դիմում,

– 2 գունավոր լուսանկար՝ 4×6 չափսի,

– անձը հաստատող փաստաթուղթ,

– բարձրագույն կրթության եւ

– համապատասխան լեզվին տիրապետելու մասին վկայականների (դիպլոմներ) պատճենները,

– պետական տուրքի վճարման անդորրագիր,

– փորձագիտական աշխատանքի ստուգման դիմաց վճարման անդորրագիր:

ՀՀ արդարադատության նախարարություն

«ԺՈՂՈՎՈՒՐԴ». Նոտարական թարգմանչի որակավորմանը մասնակցելու համար կարող են դիմել գործունակ անձինք, որոնք ունեն՝

–  բարձրագույն կրթություն,

–  օտար լեզվին տիրապետելու մասին վկայական:

ԿԱՐԳ

ՀԱՐՑ. Ինչպե՞ս է հաշվարկվում կենսաթոշակը:

Սամվել Աղաբեկյան (63 տարեկան)

ՊԱՏԱՍԽԱՆ. Աշխատանքային կենսաթոշակի չափը հիմնական կենսաթոշակի չափի եւ կենսաթոշակի աշխատանքային մասի գումարն է:

Կենսաթոշակի աշխատանքային մասը աշխատանքային ստաժի տարիների, աշխատանքային ստաժի մեկ տարվա արժեքի եւ կենսաթոշակառուի անձնական գործակցի արտադրյալն է:

Մինչեւ 10 տարվա (ներառյալ) աշխատանքային ստաժի առկայության դեպքում աշխատանքային կենսաթոշակը հաշվարկվում է Կ=Հ+ (Ս X Ա) X Գ բանաձեւով, իսկ 10 տարուց ավելի աշխատանքային ստաժի առկայության դեպքում՝ Կ=Հ+ (10 X Ա+(Ս-10) X Ա1) X Գ բանաձեւով, որտեղ`

Կ-ն կենսաթոշակի ամսական գումարն է,

Հ-ն` հիմնական կենսաթոշակի չափը,

Ս-ն` աշխատանքային ստաժի տարիները,

Ա-ն` մինչեւ 10 տարվա (ներառյալ) աշխատանքային ստաժի մեկ տարվա արժեքը,

Ա1-ը՝ 10 տարին գերազանցող աշխատանքային ստաժի մեկ տարվա արժեքը,

Գ-ն` կենսաթոշակառուի անձնական գործակիցը:

ՀՀ աշխատանքի եւ սոցիալական հարցերի նախարարություն

«ԺՈՂՈՎՈՒՐԴ». 2020թ. հունվարի 1-ից՝

1) 15 տարվա աշխատանքային ստաժի դեպքում աշխատանքային կենսաթոշակի չափը կկազմի 18000 + (10ճ950դրամ+(15-10) x 500դրամ) x 1,05 (գործակից) = 30600 դրամ:

2) 40 տարվա աշխատանքային ստաժի դեպքում աշխատանքային կենսաթոշակը կկազմի 18000 + (10ճ950դրամ+(40-10) x 500դրամ) x 1,3 (գործակից) = 49850 դրամ: