Անկախ պատգամավոր Խաչատուր Քոքոբելյանը ԱԺ-Կառավարություն հարցուպատասխանի ժամանակ Կրթության և գիտության նախարար Արմեն Աշոտյանից հետաքրքրվեց ՝ ինչո՞ւ պետք է ավագ դպրոցներում ոստիկաններ լինեն։ Նախարարի խոսքով ՝ ծրագիրն իրականացվում է վերջին տարիներին ոստիկանություն հետ համատեղ: Ծնողները մտահոգություն ունեն, որ տարբեր դպրոցներից և իրար առաջին անգամ հանդիպող աշակերտները, հատկապես տղաները կարող են անհարկի վիճաբանություններ ունենալ:
«Ծրագրի հեղինակը մենք չենք, նման փորձ կա տարբեր երկներում. շատ հեռու չգնանք, օրինակ ՝ հարևան Վրաստանում. դպրոցական ոստիկանի ծրագիրը կա այլ դպրոցներում և ոչ միայն ավագ։ Կարող է ոստիկանների ներկայությունը խոչընդոտել ուսումնական հաստատությունների ինքուրույնությունը, սակայն այն արձագանքները, որ ունենք ոստիկանների կողմից տարվող աշխատանքներից բացառապես դրական են»,- ասաց նախարարը:
Ի պատասխան Քոքոբելյանն էլ ասաց, որ դպրոցը պետք է ունենա համապատասխան պատրաստվածություն ունեցող մանկավարժական կոլեկտիվ, որը կկարողանա այդ խնդիրները լուծել: Դպրոցականին դիտարկել պոտենցիալ հանցագործ ՝ դա արդեն իսկ կրթական համակարգի խափանում է»,- ասաց պատգամավորը:
Աշոտյանի խոսքով ՝ ծրագրի նպատակներից մեկն է կոտրել կեղծ գողական կարծրատիպը:
«Ոստիկանը մի անձնավորություն է, որից պետք է ոչ թե վախենալ, այլ ճիշտ հակառակը: Բազմաթիվ տղաներ ընկերություն են անում ոստիկանների հետ: Բացի այդ ՝ դպրոցներում տղամարդկանց պակաս կա»,- եզրափակեց նախարարը:
.gif)
