Ի՞նչ արդյունքներով է վերադարձել պատգամավորական խումբը Քեսաբից

Սիրիայի հայաբնակ Քեսաբ շրջան մեկնած պատգամավորների խումբն արդեն վերադարձել է Հայաստան:

Թե ի՞նչ արդյունքներ տվեցին հանդիպումները ոչ միայն Սիրիայի նախագահի, այլև այլ պաշտոնատար այլ անձանց հետ, armlur.am-ը փորձեց պարզել պատվիրակության ղեկավար, ՀՀԿ պատգամավոր Սամվել Ֆարմանյանից:

-Պրն Ֆարմանյան, բացի Սիրիայի նախագահի և այլ պաշտոնատար անձանց հետ  հանդիպելուց, պատգամավորները ուրիշ ինչո՞վ կարողացան աջակցել քեսաբցիներին:

-Մենք ունեինք նաև փասատահավաք խմբի առաքելություն, ինչպես նաև մշակվել էին կոնկրետ առաջարկություններ մեր խմբի կողմից: Վստահ եմ՝ մեր առաջարկությունները կդառնան հիմք՝ հետագա նախաձեռնությունների համար:

-Որո՞նք են այն 3 քայլերը, որոնք պետք է արվեն ՀՀ-ի կողմից՝ քեսաբահայերին աջակցելու համար:

-Մենք պարտավոր ենք  առաջին հերթին բարոյական հարթության մեջ ցույց տալ, որ քեսաբահայերի խնդիրը մարտահրավեր է համայն հայության համար: Երկրորդ`  նյութական, ֆինանսական աջակցություն ցույցաբերել քեսաբահայերին:

Երրորդ հարթությունը դիվանագիտականն է, որտեղ տարվել են մեծ աշխատանքներ: Մեր ձայնն ավելի շատ պետք է բարձրացնենք, որպեսզի այլ երկրներից ևս լսենք դատապարտող հայտարարություններ:

Մի քանի երկրներից արդեն նման բան լսում ենք: Չորրորդ`  տեղեկատվական հարթության մեջ պետք է բարձրաձայնել ճշմարտությունը, բարձրաձայնել քեսաբցիների օրհասական վիճակի մասին:

-ՍԴՀԿ փոխատենապետ Վազգեն Մեսրոպյանը հայտարարել է, որ ՀՀ կառավարությունը չպետք է  բավարարվի դատապարտող կոչերով, անհրաժեշտ է օրինակ ՄԱԿ-ում բողոք ներկայացնել և պահանջել պատժամիջոցներ կիրառել Թուրքիայի դեմ: Կհետևի՞ ՀՀ-ն այս խորհրդին, թե՞ ոչ: 

-Ես  այդ հայտարարությանը ծանոթ չեմ,  բայց հնչում են 100-ավոր առաջարկներ, որոնց մի մասը արժանի է նաև ուշադրության: ՀՀ-ն կատարում է  իրենից կախված ամեն ինչ և այդ անելիքները գնալով ավելանալու են:

-Ո՞վ էր որոշել, թե որ պատգամավորները պետք է մեկնեին Քեսաբ:

-Դա եղել է մասնավոր նախաձեռնություն: Մենք ԱԺ-ում հանդես եկանք  հայտարարությամբ և մեկնեցինք Արման Սահակյանի ֆինանսական աջակցությամբ:

-Եթե դա մասնավոր նախաձեռնություն է, ինչո՞ւ ՀՅԴ-ից անդամներ չեն ներգրավվել պատգամավորական խմբում:

-Ես կարծում եմ ` արագ արձագանքը և քեսաբահայերի կողքին լինելու անհրաժեշտությունն օրհասական պահին ավելի կարևոր է, քան երկրորդական հնարավոր մտահոգությունները:

Իհարկե, ՀՅԴ-ն Սփյուռքում հայտնի է  իր ազդեցիկությամբ ու դերակատարությամբ, հետևաբար ՀՅԴ-ի ներգրավվածությունը կարող էր մեծ օգուտ տալ, բայց  ոչ ոք որևէ մեկին չի արգելում  նախաձեռնությամբ հանդես գալու և մեկնել Քեսաբ:

-Ինչո՞վ եք բացատրում բացասական այն մոտեցումներն ու քննադատությունները,  թե պատգամավորները մեկնել էին Քեսաբ`  միայն լուսանկարվելու համար:

-Ըմբռնումով եմ վերաբերվում նման խոսակցություններին, բայց նման քննադատություններին ամբողջությամբ ծանոթ չեմ: Ես դա չէի հավասարեցնի մեր առաքելության հետ:

Ես իմ անունից ասեմ, որ շնորհակալ եմ նման քննադատության համար: Դա ընդգծում է քննադատողների մեծ ցանկությունը  ամուր կանգնած լինել մեր հայրենակիցների կողքին:

Պատգամավորական խմբի մեկ այլ անդամ, «Ժառանգություն» խմբակցություն պատգամավոր Թևան Պողոսյանից armlur.am– ը հետաքրքրվեց ` արդյոք ՀՀ-ն  ունի բավարար  ֆինանսական հնարավորություն՝ քեսաբահայերին աջակցելու համար:

Թևան Պողոսյանի խոսքով ` բավարար ռեսուրս ասվածը հարաբերական  հասկացություն է. «Միջոցները ոչ թե լինելու են ՀՀ-ի միջոցներից, այլև համայն հայության: Եթե խնդիրը բարձրաձայնվի նաև միջազգային կառույցներում… այնպես որ  միայն քո երկրի բյուջեով չպետք  է լուծվի: Պետք է լինի համատեղ  համագործակցություն:

Եթե ամեն մեկս մտածենք ` ինչպե՞ս օգնենք, ապա օգնության ձևը կգտնենք»:

Ինչ վերաբերում է  պատգամավորական խմբի հասցեին հնչեցված  քննադատություններին, թե գնացին Քեսաբ, լուսանկարվեցին և եկան, Թևան Պողոսյանի խոսքով` բացի քննադատություններից  դրական արձագանքներ ևս լսել է:

«Ցանկալի է, որ նման քայլեր լինեն հաճախ ու համակարգված»,-եզրափակեց Պողոսյանը:

Սոնա Դավթյան