Հայաստանը միակ երկիրն է, որ չի հակադրվում պաշտոնական Մոսկվային

Ակնհայտ է, որ վերջին շրջանում Հայաստանն էլ ավելի մեծ կախման մեջ է Ռուսաստանից:

Հայաստանը փաստացի դարձել է հետխորհրդային տարածքում միակ երկիրը, որն անվերապահորեն աջակցում է ՌԴ-ին:

Պաշտոնական Երևանն ինքն է պատասխանատվություն վերցրել ստորագրելու Եվրասիական միության մասին պայմանագիրը, սակայն նույն պաշտոնական Երևանի դիրքորոշումները մանրամասն հիմնավորված չեն:

Armlur.am լրատվականի հետ զրույցում նման տեսակետ հայտնեց Ռազմավարական և ազգային հետազոտությունների հայկական կենտրոնի վերլուծաբան Էդգար Վարդանյանը ՝  մեկնաբանելով Ղազախստանի արտգործնախարար Երլան Իդրիսովի այն հայտարարությունը, թե Եվրասիական տնտեսական միության մասին պայմանագիրը կարող է ստորագրվել 2014-ի մայիսին ՝  Աստանայում:

«Պաշտոնական Երևանը չի բերում բավարար չափով փաստարկներ, թե ինչու Հայաստանը պետք է դառնա Եվրասիական միության հիմնադիր անդամ: Իսկ ընդհանարպես, ակնհայտ է, որ վերջին շրջանում Հայաստանն էլ ավելի մեծ կախման մեջ է Ռուսաստանից: Հայաստանը փաստացի դարձել է հետխորհրդային տարածքում միակ երկիրը, որն անվերապահորեն աջակցում է ՌԴ-ին:

Նույնիսկ Բելոռուսը ուկրաինական խնդրում պաշտոնական Մոսկվայի տեսակետից տարբերվող դիրքորոշում հայտնեց: Այդ երկրի նախագահ Լուկաշենկոն հանդիպեց Ուկրաինայի նախագահի պաշտոնակատար Ալեքսանդր Տուրչինովի հետ ՝  Յանուկովիչին չընդունելով որպես այդ երկրի լեգիտիմ նախագահ:

Այս ամենը թույլ է տալիս պնդել, որ Հայաստանը միակն է, որ չի հակադրվում պաշտոնական Մոսկվայի դիրքորոշմանը»,- ասաց Էդգար Վարդանյանը ՝  հավելելով, որ Եվրասիակական միության մասին պայմանագրի ստորագրումից հետո առավել մեծ կախման մեջ է ընկնելու Ռուսաստանից:

Վերլուծաբանի խոսքով, Հայաստանն ըստ էության, կանգնած է ինքնիշխանության կորստի վտանգի առաջ:

«Եթե անգամ տնտեսական մի քանի առումներով Եվրասիական միությունը առավելություններ նշի, սակայն ինքնիշխանության կորուստի վտանգը շատ ավելի լուրջ է, քան տնտեսական մի քանի օգուտները»,- նշեց նա:

Ամփոփելով ՝ Էդգար Վարդանյանը շեշտեց, որ հայաստանյան հանրությունը իշխանություններից պետք է պահանջի բացատրություններ տալ ՝  ինչո՞ւ է Հայաստանը վերջին շրջանում առավել մեծ կախվածության մեջ ընկնում Ռուսաստանից:

«Եթե Եվրասիական միությունը հավասարների միություն է, ինչո՞ւ օրինակ Ռուսաստանն էլ Հայաստանից կախման մեջ չէ»,- կես կատակ-կես լուրջ ասաց փորձագետը:

Հիշեցնենք ՝ Ղազախստանի արտգործնախարար Երլան Իդրիսովը հայտարարել է, որ Եվրասիական տնտեսական միության մասին պայմանագիրը կարող է ստորագրվել 2014-ի մայիսին ՝ Աստանայում:

«Մենք պատրաստվում ենք Եվրասիական միության մասին պայմանագրի ստորագրմանը: Այս ամսվա վերջին Մինսկում սպասվում է շատ կարևոր հանդիպում, մայիսի վերջին սպասվում է «եռյակի» գագաթնաժողովն Աստանայում, որտեղ մտադիր ենք ավարտել այդ փաստաթղթի վրա պաշտոնական աշխատանքը»,- ասել է նա:

Անի Ղազարյան