Ազատամարտիկները հետևում են «քառյակի» գործողություններին

Ազատամարտիկների ռազմադաշտային հրամանատարների խորհրդի անդամ Խաչիկ Ավետիսյանը armlur.am-ի հետ զրույցում ասաց, որ  իրենց կառույցը  պայքարի այլ տակտիկա է որդեգրել: «Մեզ ոչ ոք չի խանգարում, պարզապես այլ տակտիկա ենք որդեգրել: Մենք  աշխատում ենք, պայքարում ենք»,- ասաց ազատամարտիկը:

Այն քաղաքացիները, որոնք ցանկանում են  ազատամարտիկների  գործունեության մասին  տեղեկատվություն ստանալ, կարող են «Տիգրան Մեծ»  շտաբ գնալ ու ծանոթանալ նրանց  գործունեությանը:

-Պրն Ավետիսյան, նախորդ տարի  Սուրեն Սարգսյանը Ազատության հրապարակում իշխանություններին ու Սերժ Սարգսյանին   պահանջներ ներկայացրեց`ասելով, որ եթե դրանք չիրագործվեն, Սերժ Սարգսյանն այլևս նախագահի պաշտոնում չի լինի: Ցայսօր   Սարգսյանը նախագահի աթոռին է: Չեք կարծում, որ նման հայտարարությունները հիասթափեցնում ու մի փոքր ոչ լուրջ վերաբերմունք են ստեղծում ձեր կառույցի  հանդեպ:

-Նման հայտարարությունները կարող են հիասթափություն առաջացնել ոչ միայն կառույցի հանդեպ, այլև բոլոր նրանց նկատմամբ, ովքեր ևս նման բան են ասում:

-Այսինքն` դուք  ընդունո՞ւմ եք, որ միգուցե շտապեցիք, արեցիք ամպագոռգոռ հայտարարություն, որն անկատար մնաց:

-Մեր ցանկություններն  ավելի մեծ էին, քան հնարավորությունները:

-Իսկ հիմա իշխանափոխություն անելու ելքեր կամ ճանապարհներ տեսնո՞ւմ եք:

-Այո:

-Ո՞ւմ միջոցով: Միայնակ, թե այլ քաղաքական ուժերի հետ համատեղ:

-Միայնակ անհնար է: Բայց հույսը մեծ մասամբ մեզ վրա ենք դնում:

-Նախորդ տարի բանակցում էիք ԲՀԿ, ՀԱԿ-ի և «Ժառանգության» հետ, հիմա ի՞նչ փուլում են այդ բանակցությունները:

-Մենք  համագործակցում էինք քաղաքական այլ ուժերի հետ: Հիմա   խորհրդարանական այդ երեք ուժերի հետ  նախորդ տարվա պես նման տեմպերով չենք  համագործակցում,  բայց  համագործակցություն կա, կապերը չենք խզել: Մենք հիմա հետևում ենք «քառյակի» գործողություններին:

-Դուք կարծում եք հիմա «քառյակ» կա՞:

-Այո:

-Առաջիկայում ինչ-որ հանրահավաք կամ այլ միջոցառում նախատեսո՞ւմ է ազատամարտիկների ռազմադաշտային հրամանատարների խորհուրդը:

-Հանրահավաք չէ, բայց միջոցառում մայիսի 28-ին նախատեսվում է:

Սոնա Դավթյան