Հասարակական և միջազգային կազմակերպությունների, ալյուր արտադրող ընկերությունների, այլ գերատեսչությունների, ինչպես նաև լրատվական միջոցների մասնակցությամբ ՀՀ առողջապահության նախարարությունում առաջին անգամ լայնորեն քննարկվեց «Ցորենի ալյուրի հարստացման մասին» ՀՀ օրենքի նախագիծը: Այն կարգավորում է մարդու օրգանիզմում առանձին միկրոտարրերի և վիտամինների բացակայության կամ դրանց ոչ բավարար քանակի առկայության պատճառով առողջության անցանկալի ազդեցություններից զերծ պահելու նպատակով ցորենի ալյուրի հարստացման և հարստացված ալյուրի ու դրանից պատրաստված արտադրանքի շրջանառության հետ կապված հարաբերությունները:
Արմեն Մուրադյանը նշեց, որ ՀՀ առողջապահության նախարարությունը հանրային առողջապահական այս ծրագրի իրականացման հարցում հետևողական է լինելու:
«Հանրային առողջապահական ծրագրերի իրականացումը ՀՀ առողջապահության նախարարության ուղղակի գործառույթն է: Ես կողմանկից եմ, որպեսզի այս հարցը խորապես ուսումնասիրվի և վերլուծվի: Նման ծրագրեր իրակիանացնելիս, մենք պարտավոր ենք հաշվի առնել նաև դրանց իրականացման ծախսարդյունավետությունը»,- ընդգծեց ՀՀ առողջապահության նախարարը:
Նրա գնահատմամբ` նման հանրային քննարկումները թույլ կտան շեշտադրել և հանրությանն իրազեկել, որ ցորենի ալյուրի հարստացման ծրագրի իրականացումը հացի գնի փոփոխություն չի ենթադրում:
Արմեն Մուրադյանը շնորհակալություն հայտնեց «ՅՈՒՆԻՍԵՖ»-ին մեր երկրին ցորենի ալյուրի հարստացման գործում անրաժեշտ սարքավորումներն անվճար տրամադրելու, ինչպես նաև մեթոդաբանական հարցերում շարունակական աջակցության համար:
«Բացի այդ «ՅՈՒՆԻՍԵՖ»-ը մեկ տարի կտարամդրի նաև այն միկրոտարրերը, որոնցով հարստացվելու է ալյուրը»,-նշեց առողջապահության նախարարը` հույս հայտնելով, որ «ՅՈՒՆԻՍԵՖ»-ի աջակցությամբ հետագա տարիներին ևս մեր երկիրը հնարավորություն կունենա շուկայականից ցածր գներով ձեռք բերելու ցորենի ալյուրի հարստացման համար անհրաժեշտ վիտամինահանքանյութային հավելումները:
Խոսելով ծրագրի հանրային արձագանքի մասին, նա որպես դրական օրինակ մատնանշեց «Իմունականխարգելման ազգային ծրագրի» ներդրումը մեր երկրում, որը թեև ժամանակին միանշանակ չընդունվեց, սակայն արդյունքում լուրջ հաջողություններ գրանցեց:
ՀՀ ԱԺ առողջապահության, մայրության և մանկության հարցերի մշտական հանձնաժողովի նախագահ Արա Բաբլոյանի գնահատմամբ` ամենակարևորն այս հարցի շուրջ հասարակության մտածելակերպի փոփոխությունն է:
«Ծրագրի ներդրումը հիմնավորելիս բավական է բերել միայն Առողջապահության համաշխարհային կազմակերպության և «ՅՈՒՆԻՍԵՖ»-ի ցուցանիշները»,- նկատեց մասնագետը:
Նա հայտնեց, որ առաջիկայում օրենքի նախագիծը ՀՀ կառավարության հավանությանն արժանանալուց հետո, ԱԺ-ում կկազմակերպվեն հանրային լսումներ:
«Մանանա Գրեյն» ալյուր արտադրող ընկերության ներկայացուցիչ Կարեն Բուդախյանը նշեց, որ կողմ է ծրագրին և հետաքրքրվեց մանրամասներով:
«ՎԹ թրեդ» արլյուր արտադրող ընկերության տնօրեն Աշոտ Պողոսյանը հավաստեց, որ ուսումնասիրել է միջազգային փորձը և բազմաթիվ դրական արձագանքներ լսել ծրագրի մասին:
«Հաշվի առնելով, որ մասնագետները հիմնավորում են այս ծրագրի կարևորությունը, մենք օրենքն ընդունելու դեպքում պատրաստ ենք իրականացնել այն հանուն երեխաների և կանանց առողջության»,- վստահեցրեց նա:
ՀՀ առողջապահության նախարարի տեղակալ Սերգեյ Խաչատրյանը նշեց, որ ցորենի ալյուրի հարստացման ծրագիրն ամբողջ աշխարհում համարվում է հանրային առողջապահական ամենաարդյունավետ ծրագրերից մեկը, քանի որ շատ փոքր ներդրումով ապահովում է մեծ արդյունքներ: Դրանք տեսանելի կլինեն մի քանի տարի անց:
ՄԱԿ-ի Մանկական հիմնադրամի երևանյան գրասենյակի ներկայացուցիչ Հանրիետ Արիենսն ընդգծեց ծրագրի մասին հանրությանն իրազեկելու կարևորությունը:
Նրա խոսքով` ծրագրի մշտադիտարումը և արդյունավետության գնահատումը կիրականացվեն նախարարության հետ համատեղ:
Նշվեց, որ ծրագրի իրականացման գործում կարևոր է նաև բուժաշխատողների իրազեկումը:
Արմեն Մուրադյանը առանձնահատուկ շեշտադրեց, որ ինչպես այս ծրագրի, այնպես էլ հանրային առողջապահական մյուս ծրագրերի իրականացման գործում մեծապես կարևոր է զանգվածային լրատվական միջոցների դերը: Առողջապահական ծրագրերի իրականացման գործում նախարարը կարևորեց նաև փոխըմբռնման մթնոլորտի ձևավորման անհրաժեշտությունը:
Մասնագետների կարծիքով` «Ցորենի ալյուրի հարստացման մասին» ՀՀ օրենքի ընդունումը հնարավորություն կընձեռի մի քանի տարի անց խոսել առողջության տարբեր ցուցանիշների բարելավման մասին:
ՀՀ առողջապահության նախարարության մոր և մանկան առողջության պահպանման վարչության պետ Կարինե Սարիբեկյանը իր զեկույցում ներկայացրեց վիճակագրական տվյալներ: Ըստ Համաշխարհային բանկի տվյալների աշխարհում շուրջ 2 միլիարդ մարդ բավարար քանակով երկաթ չի ստանում, ինչի հետևանքով 0-5տ. երեխաների 47 % և հղի կանանց 42 % տառապում է սակավարյունությամբ: Ամեն օր աշխարհում 300 կին մահանում է ծննդաբերության ժամանակ անեմիայի և երկաթի անբավարարության հետևանքով, շուրջ 500 նորածին ծնվում է նյարդային խողովակի զարգացման բնածին արատով, 4000 մեծահասակ մահանում է սրտի կաթվածից:
ԱՀԿ և «ՅՈՒՆԻՍԵՖ»-ի տվյալներով աշխարհում ավելի քան 40 մլն նախադպրոցական տարիքի երեխաներ տառապում են սուր և ավելի քան 120մլն երեխաներ` խրոնիկական թերսնուցումից: Աշխարհի բնակչության 20 %-ը ենթակա է միկրոսնուցող նյութերի (երկաթ, ֆոլաթթու, յոդ, վիտամին A և այլն) անբավարարության, որի հետևանքն են հանդիսանում մի շարք ծանր ու անդարձելի ախտաբանական վիճակներ, որոնք հաճախ ավարտվում են հաշմանդամությամբ կամ բերում են մահվան:
.gif)
