Մայիսի 7-ին Երևանի Մ. Հերացու անվան պետական բժշկական համալսարանի ռազմաբժշկական ֆակուլտետում բացվել է նոր թանգարան: Բացման հանդիսավոր արարողությանը մասնակցել են նաև ՀՀ պաշտպանության նախարար Սեյրան Օհանյանը եւ նրա տիկինը՝ ՀՀ առողջապահության նախարարի խորհրդական Ռուզաննա Խաչատրյանը:
Ասել է թե՝ նախարար Օհանյանի կինն էլի «առաջին գծում է»: Լուսանկարում երևում է, թե ինչպես է նա ամուսնուն ծանոթացնում «բժշկական նրբություններին»:
«Զինվորական բժիշկների հայկական ասոցիացիա» հասարակական կազմակերպության նախագահ Ռուզաննա Խաչատրյանը, որը մասնագիտությամբ ատամնաբույժ է, պարզվում է, չի ազդվում քննադատությունների այն ալիքից, որ բարձրացել է՝ հենց իր լուսանկարների հաճախակի հրապարակման պատճառով: Նա շարունակում է ինքնագովազդը՝ Սեյրան Օհանյանի հակագովազդի հաշվին՝ ի հեճուկս առաջին տիկին Ռիտա Սարգսյանի:
Ու սա այն դեպքն է, որ ոչ թե լրագրողներն են մտնում «նախարարի տուն», այլ նախարարն է իր ընտանիքին հրապարակայնեցնում՝ ամեն անգամ ցուցադրելով գեղեցկուհի կնոջ լուսանկարները՝ սարքովի հարցազրույցների ֆոնին: Իհարկե, կան երկրներ, որտեղ բարձրաստիճան պաշտոնյաների կանայք կամ աղջիկները չափից ավելի ակտիվությամբ են աչքի ընկել (օրինակ՝ Սիրիայի առաջնորդ Բաշար Ասադի կինը, Ադրբեջանի նախագահ Իլհամ Ալիեւի կինը, վերջապես Չաուշեւսկու կինն ու Բրեժնևի դուստրը իրենց ակտիվությամբ միշտ գերազանցել են պաշտոնյաներին): Սակայն այս երևույթը լավ չի ընկալվել ո´չ այդ երկրներում, ո´չ էլ՝ գործընկեր երկրների մոտ:
Ու մենք ամենեւին չենք ցանկանա, որ ՀՀ որեւէ պաշտոնյա, առավել եւս պաշտպանական գերատեսչության ղեկավարը որեւէ հարցում անլուրջ իմիջ ունենա կամ ստվերում մնա: Պարզապես կա մի ճշմարտություն, որ կառավարման համակարգում պետք է դերակատարություն ունենան այն մարդիկ, որոնք նշանակված են եւ կոչված են հենց դրա համար:
Անի Ստեփանյան
.gif)
