ՀՀ աշխատանքի և սոցիալական հարցերի փոխնախարար Սմբատ Սաիյանը խորհրդարանին հորդորեց երկրորդ ընթերցմամբ դեմ քվեարկել կենսաթոշակների և նպաստների անկանխիկ վճարմանն անցնելու նախագծին. նախագծում պետք է կատարվեն ժամկետների փոփոխություններ:
«Պետական կենսաթոշակների մասին» օրենքում փոփոխություններ եւ լրացումներ կատարելու մասին և կից ներկայացված օրենքների նախագծերի փաթեթը ԱԺ նիստում ներկայացրեց ՀՀ աշխատանքի և սոցիալական հարցերի փոխնախարար Սմբատ Սաիյանը:
Փոխնախարարը հիշեցրեց, որ նախագիծը վերաբերում է կենսաթոշակների վճարման անկանխիկ եղանակի ներդրմանը: Մասնավորապես, նախատեսվում է որպես կենսաթոշակի վճարման հիմնական եղանակ սահմանել անկանխիկ եղանակը՝ բանկային հաշվի միջոցով վճարման եղանակը՝ բացառություններ սահմանելով որոշակի կատեգորիայի անձանց համար: Բացառությունների շրջանակում անձինք կարող են իրենց կենսաթոշակը ստանալ իրենց ընտրությամբ՝ կանխիկ կամ անկանխիկ եղանակով: Օրինակ, եթե կենսաթոշակառուի 75 տարին լրացել է, կամ կենսաթոշակառուն 1-ին կամ 2-րդ խմբի հաշմանդամ է, կամ, այլ կերպ ասած, քաղաքացին ունի շարժունակության խնդիր, ապա նրա դիմումի հիման վրա կենսաթոշակը կարող է վճարվել կանխիկ կամ անկանխիկ եղանակով:
Կառավարությունն առաջին ընթերցմամբ քննարկմանն առաջարկվում էր առաջին փուլում՝ 2020 թվականի հուլիսի 1-ից այս կանոնը տարածել Երևան, Գյումրի և Վանաձոր քաղաքներում: Դրանից հետո աստիճանաբար այն պետք է տարածվեր մնացած քաղաքներում, մեծ գյուղերում: Եվ 2023 թվականից այն արդեն կգործեր նաև գյուղական այն բնակավայրերում, որտեղ կա 1000-ից պակաս բնակչություն:
«Հաշվի առնելով առկա իրողությունները՝ առաջինից երկրորդ ընթերցում ընկած ժամանակում քննարկումների արդյունքում որոշվել է համակարգի մեկնարկի ամսաթիվը տեղաշարժել 2 ամսով և սահմանել 2020 թվականի սեպտեմբերի 1-ը: Այս տարբերակը արժանացել է նաև ԱԺ հանձնաժողովի դրական եզրակացությանը: Սակայն հանձնաժողովի նիստից հետո շարունակվող քննարկումների արդյունքում նաև որոշում կայացվեց ամբողջ գործընթացը հետաձգել 6 ամսով: Ըստ այդմ, մենք պետք է խնդրենք խորհրդարանին դեմ քվեարկել այս տարբերակին, որպեսզի կառավարությունը հնարավորություն ունենա ԱԺ կանոնակարգ օրենքի համաձայն՝ նախագիծն ուղարկել առաջարկությունների ներկայացման ռեժիմ, որպեսզի կարողանանք մեկ անգամ ևս քննարկել ժամկետների խնդիրը և լրամշակված տարբերակը ներկայացնել ԱԺ-ի քննարկմանը»,-ասաց փոխնախարարը:
.gif)
