«Բոլոր սուպերմարկետները մեր ապրանքն առանձնացրել են ու ասում են՝ եկեք տարեք». թուրքական ապրանքը բոյկոտում են

«Ոչ թուրքական ապրանքներին»․ Հայաստանում արդեն մի քանի օր է՝ թուրքական արտադրության ապարանքները բոյկոտելու կոչեր են հնչում: Ի դեպ, այս նպատակով նաեւ ստորագրահավաք է կազմակերպվել: Ավելին, կան սուպերմարկետներ ու խանութներ, որոնք դադարեցրել են թուրքական ապրանքների վաճառքը: Նկատենք, որ թուրքական ապրանքների դեմ բոյկոտի ցուցակում հայտնվել է նաեւ «Գոլդեն ռոզ» ընկերությունը, որը Հայաստանում զբաղվում է կոսմետիկայի ներկրմամբ եւ վաճառքով: Ընկերությունը կոսմետիկայի մի մասը տարիներ շարունակ ներկրում է Թուրքիայից:

ArmLur.am-ը զրուցեց «Գոլդեն ռոզ» ընկերության վաճառքի գծով տնօրեն Վարդան Միրզոյանի հետ եւ հետաքրքրվեց, թե ինչ ազդեցություն է ունեցել բոյկոտը վաճառքի ծավալների վրա: Պարզվում է՝ ընկերությունն այս պահին գտնվում է ծայրահեղ ծանր վիճակում: «Այս երեւույթը կարելի է երկու մասի բաժանել. օրինակ կան մարդիկ, որոնք պատրաստվում են նոր ներկրել եւ կա մի հատված՝ որ արդեն բերել են: Մեր ընկերությունը բերել է այդ ապրանքը, պետության նկատմամբ հարկային պարտավորությունները պարտաճանաչ կատարում ենք: Մենք հազար խոշոր հարկատուների ցանկում 250-րդն ենք ու 110 աշխատող ունենք: Բայց մենք հիմա արդեն մտածում ենք, թե ինչ ենք անելու այդ աշխատողների հետ: Խանութները հետ են վերադարձնում մեր ապրանքը, բայց մենք այդ ապրանքն ի՞նչ անենք: Տանենք թափե՞նք, բայց դա գումար է… ես միլիարդի չափ հարկ եմ վճարում պետությանը»,- իրավիճակը ներկայացրեց ընկերության ներկայացուցիչը:

Մեր զրուցակիցը նշեց, որ այս օրերին շրջանառություն չունեն. «Բոլոր սուպերմարկետները մեր ապրանքը առանձնացրել են ու ասում են՝ եկեք տարեք: Ի՞նչ անես, երբ ապրանքը հավաքում ու տալիս են ձեռքդ ու ասում են՝ գնա: Մենք չգիտենք, թե ինչպես ենք այդ աշխատողների աշխատավարձերը վճարելու: Հարկերը չեն գոյանում, մենք ամսական 70 մլն դրամ հարկ վճարող ընկերություն ենք, բայց ես արդեն 12-րդ օրն է՝ 0 շրջանառություն ունենք»: Ընկերության վաճառքի գծով տնօրենը փոխանցեց նաեւ, որ այս պահին չեն ներմուծում:

Սյունէ Համբարձումյան