The Guardian․ Հայաստանի եվրոպամետ կուսակցությունը հաղթել է ընտրություններում և ամրապնդել երկրի հեռացումը Ռուսաստանից

Բրիտանական The Guardian պարբերականը Հայաստանի 2026 թվականի Ազգային ժողովի ընտրությունները ներկայացրել է որպես երկրի եվրոպական ուղղության հաստատում՝ նշելով, որ ընտրությունների արդյունքները ամրապնդել են վարչապետ Նիկոլ Փաշինյանի քաղաքական դիրքերը և շարունակել են Հայաստանի աստիճանական հեռացումը Ռուսաստանի ազդեցության գոտուց։

«Հայաստանի եվրոպամետ կուսակցությունը հաղթել է ընտրություններում և ամրապնդել երկրի հեռացումը Ռուսաստանից» վերնագրով հրապարակման մեջ The Guardian-ը գրում է, որ «Քաղաքացիական պայմանագիր» կուսակցության հաղթանակը ողջունվելու է Բրյուսելում, մինչդեռ Մոսկվայում այն կընդունեն դժգոհությամբ։

Պարբերականի գնահատմամբ՝ ընտրությունների արդյունքները Փաշինյանին ավելի մեծ հնարավորություններ են տալիս առաջ մղելու իր հիմնական քաղաքական նպատակը՝ Ադրբեջանի հետ խաղաղության պայմանագրի կնքումը և Թուրքիայի հետ հարաբերությունների կարգավորումը։

The Guardian-ը նշում է, որ ընտրությունները տեղի են ունեցել Լեռնային Ղարաբաղի կորստից հետո առաջին անգամ։ Հոդվածում ընդգծվում է, որ ընդդիմությունը փորձել է այդ իրադարձությունները ներկայացնել որպես Փաշինյանի քաղաքականության ձախողում, մինչդեռ վարչապետը դրանք օգտագործել է որպես հիմնավորում՝ պնդելով, որ երկար տարիներ Ղարաբաղյան հակամարտությունը Հայաստանը պահել է մշտական հակամարտության և Ռուսաստանից կախվածության մեջ։

Պարբերականը նաև առանձնահատուկ ուշադրություն է դարձրել հայ-ռուսական հարաբերություններին՝ հիշեցնելով, որ վերջին տարիներին Երևանը սառեցրել է մասնակցությունը Ռուսաստանի գլխավորած Հավաքական անվտանգության պայմանագրի կազմակերպությանը (ՀԱՊԿ), իսկ նախընտրական շրջանում Մոսկվան տնտեսական սահմանափակումներ է կիրառել հայկական մի շարք ապրանքների նկատմամբ։

Միաժամանակ, The Guardian-ը նշում է, որ Փաշինյանը ընտրություններից հետո կրկին հայտարարել է՝ Հայաստանը չի պատրաստվում ընտրություն կատարել Ռուսաստանի և Արևմուտքի միջև և շարունակելու է վարել հավասարակշռված արտաքին քաղաքականություն։

Հոդվածում անդրադարձ կա նաև ներքաղաքական իրավիճակին։ The Guardian-ը հիշեցնում է, որ նախընտրական շրջանում իրավապահները ձերբակալել են մի շարք ընդդիմադիր գործիչների, իսկ քննադատները վարչապետին մեղադրում են իշխանության չափազանց կենտրոնացման և ավելի անհատականացված կառավարման ոճի համար։

Չնայած այդ քննադատություններին՝ պարբերականը նշում է, որ շատ ընտրողներ կրկին աջակցել են Փաշինյանին՝ ընդդիմությանը համարելով ավելի վատ այլընտրանք։ The Guardian-ի ընդհանուր գնահատմամբ՝ Հայաստանի ընտրությունները ոչ միայն իշխանության վերարտադրման, այլև երկրի արտաքին քաղաքական ուղղության վերաբերյալ քվեարկություն էին, որի արդյունքում ընտրողները կրկին վստահություն են հայտնել եվրոպական ինտեգրման և տարածաշրջանային խաղաղության օրակարգին։

Հեղինակ՝ Անի Վարդանյան