«Ժողովուրդ»-ն արդեն տեղեկացրել է, որ ԱԺ ՀՅԴ խմբակցությունը մտադիր է չորեքշաբթի օրը՝ քառօրյայի ժամանակ, արտահերթ քննարկել 100 տոկոս համամասնական ընտրակարգին անցնելու նախագիծը: Մեր տեղեկություններով՝ քննարկումների ժամանակ ԱԺ ՀՀԿ խմբակցությունը հայտարարել է, որ անիմաստ է կրկին այդ նախագիծը քննարկման դնել, քանի որ այժմ փոփոխություն է կատարվում նաեւ ՀՀ Սահմանադրությունում, ուստի դրան զուգահեռ նման նախագիծ քննարկելն ուղղակի անտրամաբանական է:
Հիշեցնենք, որ դեռեւս 2012թ. փետրվարի 29-ին ԱԺ-ն քվեարկությամբ մերժեց «Ժառանգություն» եւ ՀՅԴ խմբակցությունների նախաձեռնած օրինագիծը` 100 տոկոս համամասնական ընտրակարգին անցնելու վերաբերյալ: Այդ ժամանակ օրինագծին կողմ քվեարկեց 30 պատգամավոր, որոնց թվում էին «Ժառանգություն», ՀՅԴ խմբակցությունները եւ մի քանի ԲՀԿ-ական պատգամավորներ: Օրինագծին դեմ քվեարկեց 56 պատգամավոր, ձեռնպահ` չորսը:
«Ժողովուրդ»-ը զրուցել է ԱԺ խմբակցությունների ներկայացուցիչների հետ` պարզելու նրանց տեսակետն այս հարցի շուրջ:
ԱԺ ՀՅԴ խմբակցության անդամ ԱՐԾՎԻԿ ՄԻՆԱՍՅԱՆ
-Պարոն Մինասյան, Ձեր խմբակցությունը որոշել է արտահերթ կարգով քննարկել 100 տոկոս համամասնական ընտրակարգին անցնելու նախագիծը, ինչու եք այն այդքան հրատապ համարում: Իշխող ՀՀԿ խմբակցությունը կարծում է, որ դրա ժամանակը չէ:
-Դա Հանրապետական կուսակցության տեսակետն է, իսկ մենք գտնում ենք, որ ոչ միայն հրատապ է, այլեւ անհրաժեշտ, որպեսզի օր առաջ հաստատվի 100 տոկոս համամասնական ընտրակարգը, ավելին` մեր նախագծով մենք առաջարկում ենք անցումային փուլ: Մինչեւ հաջորդ համապետական` Ազգային ժողովի ընտրությունները, մեծամասնական ընտրակարգով ընտրված բոլոր պատգամավորների լիազորությունները դադարեցվելու կամ պատգամավորական մանդատը վայր դնելու դեպքում, այնտեղ առաջադրվելու իրավունքները վերապահվելու են կուսակցություններին:
-Բայց նախագծի դեմ է արտահայտվել նաեւ Սերժ Սարգսյանը` այն համարելով ժամակավրեպ: Այդքանից հետո ինչպե՞ս եք պատրաստվում այդ նախագիծն իրականություն դարձնել:
-Դա իրենց իրավունքն է, եթե դեմ են` թող դեմ լինեն, մենք ունենք մեր փաստարկները ու կներկայացնենք դրանք: Իսկ այդ փաստարկները հիմնավորված են, դրանք բազմիցս հնչել են, մեկ անգամ եւս կհնչեցնենք: Եթե իրենք համակարծիք չեն, դա իրենց խնդիրն է: Ցանկացած պայքարի ժամանակ էլ միշտ հույս կա:
ԱԺ «Ժառանգություն» խմբակցության քարտուղար ԹԵՎԱՆ ՊՈՂՈՍՅԱՆ
-Պարոն Պողոսյան, ՀՅԴ-ի` 100 տոկոս համամասնական ընտրակարգին անցնելու նախագծի հետ կապված «Ժառանգություն» խմբակցությունն ինչ դիրքորոշում ունի։
-«Ժառանգություն»-ը նախկինում ունեցել է նախաձեռնություն, ընդհանուր գաղափարը Ընտրական օրենսգրքում փոփոխություններ կատարելու մասին էր, որը նաեւ մեր նախընտրական ծրագրում էր նշված: Սա ուղղակի նախաձեռնություն էր, որը ՀՅԴ-ն արել էր ժամանակին ու այն հետաձգվել էր: Այժմ ժամանակը եկել է ու ընդդիմադիր խմբակցությունն իրավունք ունի հարցը համարել արտահերթ: Շատ լավ կլինի, որ այդ հարցը կարողանանք քննարկել:
-Այսինքն՝ Ձեր խմբակցությունն այս նախագծին կո՞ղմ է:
-Մենք միայն ողջունում ենք նման նախագծերը. կլինի առաջարկը, մենք էլ կմասնակցենք քննարկումներին: Բնական է, որ մենք էլ ենք կողմնակից 100 տոկոս համամասնական համակարգով ընտրություններին: Իսկ քննարկումների ժամանակ մենք մեր դիրքորոշումները կարտահայտենք: Չնայած հանձնաժողովում մեծամասնությունն արդեն դեմ է քվեարկել, բայց, այնուամենայնիվ, մեր իրավունքն է, որը մենք օգտագործելու ենք:
ԱԺ ՀԱԿ խմբակցության անդամ ՀՐԱՆՏ ԲԱԳՐԱՏՅԱՆ
-Պարոն Բագրատյան, ԱԺ ՀՅԴ խմբակցությունը որոշել է արտահերթ կարգով քննարկել 100 տոկոս համամասնական ընտրակարգին անցնելու նախագիծը: Ինչպիսին է այս հարցի շուրջ Ձեր տեսակետը:
-Ցավոտ հարց է, կարծում եմ, որ, այնուամենայնիվ, համամասնական ընտրությունները պետք է կապվեն նաեւ նախագահի ինստիտուտի հետ: Ընդհանուր առմամբ կարելի է դրան գնալ, եթե նախագահի ինստիտուտը 100 տոկոսով պահպանվում է, որովհետեւ սա կարող է ստանալ անհասկանալի վիճակ: Իմ մոտեցումը սա է. եթե համամասնական է, մեծամասնականը հետը պետք է լինի, այսինքն՝ ոչ թե ցուցակով է քվեարկվում, այլ ներկայացնում է կուսակցությունը ցուցակ եւ օկրուգներով դնում է դեպուտատներ: Այսինքն՝ անպայման դուք ներկայացնում եք կուսակցություն ու օկրուգներում դրվում է թեկնածություն: Սա է իմ տեսակետը:
ԱԺ ԲՀԿ խմբակցության անդամ ՍՏԵՓԱՆ ՄԱՐԳԱՐՅԱՆ
-Պարոն Մարգարյան, ԲՀԿ-ն ինչպե՞ս է վերաբերվում 100 տոկոս համամասնական ընտրակարգին անցնելու` ՀՅԴ-ի նախագծի քննարկմանը:
-Մենք միշտ էլ կողմ ենք եղել, մենք շատ կարեւորում ենք դա եւ եւս մեկ անգամ կփորձենք քննարկում անցկացնել: Դա միշտ էլ հրատապ հարց է եղել, մենք կողմ ենք եւ աջակցելու ենք:
ԱԺ ՀՀԿ խմբակցության անդամ ՄԿՐՏԻՉ ՄԻՆԱՍՅԱՆ
-Պարոն Մինասյան, ՀՀԿ-ն ինչպե՞ս է վերաբերվում 100 տոկոս համամասնական ընտրակարգին անցնելու ՀՅԴ-ի նախագծին:
-Կարծում եմ, որ այդ հարցը որեւէ հրատապություն չունի, ես տարիներ շարունակ իմ տեսակետն ասել եմ այդ հարցի հետ կապված ու հիմա էլ ասում եմ. ես գտնում եմ, որ մի երկիր, որտեղ… պառլամենտում հնարավոր չէ տարածքային որեւէ ներկայացուցչություն չունենալ: Այսինքն՝ մեծամասնականի ընտրությունը ես համարում եմ պարտադիր:
ՍՈՆԱ ԳՐԻԳՈՐՅԱՆ
.gif)
