ՀՀ աշխատանքի և սոցիալական հարցերի նախարար Արտեմ Ասատրյանի ուղերձը
Աշխատանքի օրվա կապակցությամբ.
«Սիրելի’ հայրենակիցներ,
Շնորհավորում եմ Ձեզ Աշխատանքի օրվա կապակցությամբ:
Մեր ժողովրդի, հայ մարդու համար դարեր շարունակ աշխատանքը եղել է կենսակերպ, աշխատասիրությունը դարձել է ազգային առանձնահատկություն, իսկ բարիքի ու արժեքի ստեղծումն անդարձ լրացրել են ազգային հարուստ ավանդույթները:
Ցանկացած հասարակության և պետության զարգացման երաշխիքը նրա քաղաքացու, մարդու ստեղծագործ աշխատանքն է: Մյուս կողմից` մարդու և նրա ընտանիքի երջանիկ ու բարեկեցիկ կյանքի համար անհրաժեշտ պայման է կայուն զբաղվածությունը, կատարելագործման անընդհատ ձգտումը` իր կուտակած գիտելիքին և ունակություններին համարժեք:
Որպես աշխատանքի ու սոցիալական հարցերի նախարար, ինձ մտահոգում է, որ մեր երկրում բազմաթիվ աշխատունակ քաղաքացիներ տարիներ շարունակ աշխատանք են փնտրում և չեն կարողանում գտնել: Նույնքան մտահոգիչ է, որ զբաղվածությամբ ապահովված մարդիկ բավարարված չեն իրենց վաստակով և աշխատանքի այլ պայմաններով:
Այսօր մեր առջև ծառացած է արժանապատիվ և կայուն ապահովման խնդիրը, որի լուծմանն են ուղղված կառավարության կողմից աշխատանքի, աշխատավարձի և զբաղվածության ոլորտում իրականացվող համակողմանի բարեփոխումները: Այս բարդ խնդրի լուծման նպատակով մեր ուժերի ներածին չափով փորձում ենք պետական ակտիվ աջակցությամբ և անհատական կարիքի գնահատման հիման վրա` վերապատրաստել քաղաքացիներին, տարբեր ծրագրերով օգնել աշխատաշուկայում անմրցունակ անձանց աշխատանքի տեղավորող գործատուներին, խթանել այդ անձանց ինքնազբաղվածությունը:
Ուրախ եմ, որ վերջին տարիներին հազարավոր մարդիկ պետական աջակցությամբ գտել են իրենց ունակություններին համապատախան զբաղմունք` հարմար աշխատանք, և հաղթահարել են գործազրկությունը:
Մենք չպետք է ընկրկենք դժվարությունների առջև և պետք է հնարավոր բոլոր միջոցներով փորձենք գտնել մեր երկրում աշխատանքով բարիք ստեղծելու, սեփական գիտելիքները խորացնելու, ունակությունները մշտապես զարգացնելու արդյունավետ ուղին: Բնականաբար, երկրի տնտեսության զարգացմանը զուգահեռ մենքկունենանք զբաղվածության ավելի լավ ցուցանիշներ և հարմար աշխատանք գտնելը կլինի առավել դյուրին, իսկ տարեցտարի ավելի մեծ թվով մարդիկ մայիսի մեկը կընկալեն որպես իրենց` աշխատավորի վաստակած տոն:
Այսօր` Աշխատանքի օրվա կապակցությամբ, ես բոլորին մաղթում եմ հաջողություն իրենց ստեղծագործ ու նորարար նախաձեռնություններում, աշխատավորներին` նորանոր ձեռքբերումներ, իսկ մեր հայրենիքին` խաղաղություն և առաջընթաց»:
.gif)
