Ինչպես հայտնի է՝ վերամշակող ընկերությունները դեռեւս օգոստոսի 1-ից սկսել են լոլիկի մթերումը: Այս բանջարեղենը, սակայն, մթերվում է բավականին ցածր գնով` 35-ից 40 դրամով: Այդ պատճառով գյուղացիները հուսահատված են, քանի որ նման գնով լոլիկը վաճառելու դեպքում նրանք չեն կարողանում ծածկել անգամ բանջարեղենի մշակման ինքնարժեքի ծախսերը:
«Ժողովուրդ»-ը ՀՀ գյուղատնտեսության նախարարությունից տեղեկացավ, որ լոլիկի մեծաքանակ մթերումներ իրականացնում են համեմատաբար խոշոր հետեւյալ ընկերությունները՝ «Արտաշատի պահածոների գործարան» ԲԲԸ-ն («Արտֆուդ»), «ՄԱՊ» ՓԲԸ-ն, «Երեւանի «Արարատ» սննդի կոմբինատ» ՍՊԸ-ն, «Եվրոթերմ» ՓԲԸ-ն եւ «Պռոշյանի կոնյակի գործարան» ՍՊԸ-ն:
ԳՆ-ից հայտնեցին նաեւ, որ վերամշակող ընկերությունները լոլիկը տոմատի մածուկի արտադրության նպատակով մթերում են 1կգ-ը 40 դրամով, իսկ տոմատային այլ պահածոների համար՝ 1կգ-ը 80-125 դրամով:
«Եվրոթերմ» ընկերության ներկայացուցիչ Գուրգենը «Ժողովուրդ»-ին տեղեկացրեց, որ 1 կիլոգրամ լոլիկը իրենց ընկերությունը գյուղացուց մթերում է 35 դրամով: Նշված ընկերությունը լոլիկը մթերում է միայն տոմատի մածուկի համար: «Մենք դեռ չենք սկսել լոլիկի մեծ քանակությամբ մթերումը: Ընթացքում ենք: Բայց մեր հաշվարկներով՝ այս տարի պետք է որ ավելի մեծ քանակությամբ լոլիկ մթերվի»,- փոխանցեց «Եվրոթերմի» ներկայացուցիչը:
«Արտաշատի պահածոների գործարան» ԲԲԸ-ի մթերման հարցերով պատասխանատու Դավիթ Ավետիսյանը «Ժողովուրդ»-ին հայտնեց, որ իրենց ընկերությունը լոլիկի 1 կիլոգրամը 40 դրամով է մթերում. «Մենք ընդունում ենք նաեւ 70 դրամով մանր եւ 120 դրամով մանրապտուղ լոլիկ, որոնք նախատեսված են մարինադների համար»:
«Ժողովուրդ»-ը «Արտֆուդ»-ի ներկայացուցչից հետաքրքրվեց՝ գյուղացիներին ինչ տարբերակով՝ ապառի՞կ, թե՞ կանխիկ են վճարում լոլիկի համար: Հարցին ի պատասխան՝ Դ. Ավետիսյանն ասաց. «Մենք գյուղացիներին ունենք մեծ քանակությամբ կանխավճարներ տրամադրած դեռեւս փետրվար ամսից, որի դիմաց իրենք վաճառում են լոլիկը: Իսկ 70 եւ 120 դրամանոց մանր եւ մանրապտուղ լոլիկի համար կանխիկ վճարում ենք»: Հիշեցնենք, որ ՀՀ գյուղատնտեսության նախարար Սերգո Կարապետյանը, մինչեւ նախարար նշանակվելը, ղեկավարում էր «Արտաշատի պահածոների գործարան» ընկերությունը, որը հանրությանը հայտնի է «Արտֆուդ» ապրանքանիշով: Այս ընկերության անունը կապվում է ՀՀ վարչապետ Հովիկ Աբրահամյանի ընտանիքի հետ, իսկ ընկերության գործադիր տնօրենն է Վաչիկ Կարապետյանը, նույն ինքը՝ գյուղնախարարի որդին:
«Ժողովուրդ»-ը փորձեց գյուղապետերից հետաքրքրվել, թե այս օրերին գյուղացիները մթերման հետ կապված ինչ խնդիրների են հանդիպում: ՀՀ Արմավիրի մարզի Սարդարապատի գյուղապետ Բաբկեն Վարդանյանը «Ժողովուրդ»-ի հետ զրույցում ասաց, որ գյուղի բնակիչներն իրենց լոլիկը վաճառում են ե՛ւ տեղական շուկայում, ե՛ւ «Մապ» ընկերությանը, ե՛ւ Էջմիածնի պահածոների գործարանին: «Այս օրերին լոլիկի մեծ պահանջարկ կա, բայց մեր գյուղացիները չեն կարողանում իրենց կատարած ծախսը հանել, խեղճ մարդիկ եկամուտ չեն ստանում: Մթերման գինը շատ ցածր է: Եթե նորմալ քանակությամբ բերք հավաքեին, ապա լոլիկի մշակությունը շահեկան կլիներ»,- նշեց գյուղապետը` հավելելով, որ Սարդարապատի բնակիչները դժգոհում են, քանի որ գյուղում արդեն երկու տարի է, ինչ առկա է ճրագախոտ տեսակի հիվանդությունը, որի հետեւանքով լոլիկի եւ սմբուկի բերքատվությունը նվազում է:
«Դրա դեմ բուժման պայքար չեն կարողանում մշակել: Դա մեծ վնաս է տալիս մեզ: Չկա բուժման միջոց: Նախորդ տարի դիմեցինք գյուղատնտեսության նախարարություն, համապատասխան մասնագետներ եկան, փորձեցին բուժումներ անել, բայց միեւնույն է՝ անբուժելի է այդ հիվանդությունը: Արդեն երկու տարի է, ինչ այս հիվանդությունը մեր գյուղում կա: Թե որտեղից եկավ ու ընկավ մեզ մոտ, այդպես էլ չիմացանք: Օրինակ՝ նույն հողատարածքի վրա պղպեղ էլ կա աճած, որը սմբուկի կամ լոլիկի հարեւանությամբ է, բայց այդ հիվանդությունը դրանց չի կպնում: Մեր գյուղի ամբողջ տարածքը վարակված է. ջրի, քամու միջոցով էլ է տարածվում այդ հիվանդությունը: Այս տեսակի հիվանդությունը իր վատ ազդեցությունն է թողնում սմբուկի եւ լոլիկի բերքատվության վրա»,- նկատեց գյուղապետը:
Եթե Սարդարապատում գյուղացիները դժգոհում են ճրագախոտ տեսակի հիվանդությունից, ապա Արեւիկի բնակիչները բողոքում են շոգից: Այս գյուղի բնակիչները, բացի լոլիկը իրացնելու խնդրից, ունեն նաեւ այլ դժվարություններ: Բանն այն է, որ շոգ եղանակի պատճառով Արեւիկի բնակիչները քիչ քանակությամբ են լոլիկ հավաքում: «Նույնիսկ հողատարածքները ջրելն էլ չի օգնում: Իսկ առանց ջրի բույսն էլ չի աշխատում: Ջրում ենք, անմիջապես չորանում է, բույսը չի հագենում, դաշտերը չորանում են, դրա համար էլ քիչ բերքատվություն են ունենում մարդիկ»,- նկատեց Արեւիկի գյուղապետ Իշխան Ծատուրյանը` շեշտելով, որ գյուղացիներն այս տարի քիչ քանակությամբ են լոլիկ հավաքում եւ այն ստիպված են լինում իրացնել տեղական շուկայում:
Եվ մինչ կիզիչ օգոստոսյան արեւի տակ խեղճ գյուղացիները փորձում են հավաքել իրենց՝ ամիսների տանջանքի արդյունքը եւ այն ստիպված «ջրի գնով» հանձնում մթերող ընկերություններին, ՀՀ գյուղատնտեսության նախարար Սերգո Կարապետյանը շարունակում է հայկական հեռուստաընկերություններով բոցաշունչ ելույթներ ունենալ եւ հայտարարել, որ գյուղատնտեսության ոլորտում ամեն ինչ լավ է: Ի դեպ, բոլորովին վերջերս ՀՀ գլխավոր գյուղատնտես Սերգո Կարապետյանը «Արմենիա» հեռուստաընկերության եթերից ինքնագոհ հայտարարեց, թե այս տարի իր ղեկավարած ոլորտում ոչ թե աճ, այլ շատ մեծ աճ է գրանցվել:
ՍՅՈՒՆԷ ՀԱՄԲԱՐՁՈՒՄՅԱՆ
ՇՆՈՐՀԱԿԱԼՈՒԹՅՈՒՆ ՊԱՐՈՆ ՏԱՐՈՆ ՄԱՐԳԱՐՅԱՆԻՆ
Երեւանի քաղաքապետարանում տեղի ունեցած աշխատանքային հերթական խորհրդակցության ժամանակ քաղաքապետ Տարոն Մարգարյանը պատասխանատու բոլոր կառույցներին հանձնարարել է կարճ ժամկետում ավարտել բոլոր աշխատանքներն ու հավուր պատշաճի նախապատրաստվել նոր ուսումնական տարվան:
Ըստ այդմ, հանձնարարվել է կրթօջախների հարակից տարածքների մաքրման եւ բարեկարգման նպատակով կազմակեպել շաբաթօրյակներ, ինչպես նաեւ՝ գույքագրել ու ճանապարհային ոստիկանության հետ համատեղ դպրոցների հարակից տարածքներում կատարել համապատասխան գծանշումներ: Հանրակրթության վարչության պետին էլ հանձնարարվել է ձեռնարկել համապատասխան քայլեր՝ քաղաքապետարանի ենթակայության դպրոցների տարրական դասարանների բոլոր աշակերտներին անվճար դասագրքերով ապահովելու ուղղությամբ: Հաշվի առնելով սեպտեմբերի՝ հատկապես առաջին օրերին տրանսպորտի գերբեռնված աշխատանքը՝ քաղաքապետ Տարոն Մարգարյանը հանձնարարել է համապատասխան քայլեր ձեռնարկել հասարակական տրանսպորտի կանոնավոր աշխատանքի ապահովման ու քաղաքացիների պատշաճ ուղեւորափոխադրում իրականացնելու ուղղությամբ:
Նոր ուսումնական տարին բարձր մակարդակով դիմավորելու եւ երեխաների անվտանգությունն ապահովելու նպատակով սեպտեմբերի 1-ից 30-ը ճանապարհային ոստիկանության հետ համատեղ կհայտարարվի անվտանգ երթեւեկության միամսյակ եւ կրթօջախների հարակից տարածքներում ուժեղացված հսկողություն կսահմանվի:
ԱՇԽԱՏՈՒՄ ԵՆ
«Հաշվի առնելով այն փաստը, որ վերջին շրջանում մամուլում հաճախ են շրջանառվում «Լեռ-էքս» ՍՊԸ-ի վերաբերյալ իրականությանը չհամապատասխանող տեղեկություններ՝ ցանկանում ենք եւս մեկ անգամ ընդգծել, որ «Լեռ-էքս» ՍՊԸ-ն պատկանում է Զանգեզուրի պղնձամոլիբդենային կոմբինատին եւ չունի ոչ մի առնչություն պետական որեւէ պաշտոնյայի կամ գործարարի հետ: Իրականությանը չի համապատասխանում նաեւ այն տեղեկությունը, թե վերջերս «Լեռ-էքս»-ից հեռացվել է 60 աշխատակից: «Լեռ-Էքս»-ն արդեն մոտ մեկ տարի է, ինչ չի գործում, սակայն կոմբինատի բոլոր՝ 430 աշխատակիցները ներգրավված են այլ նախագծերում, աշխատում են, վարձատրվում եւ անցնում վերապատրաստման դասընթացներ»,- երեկ նման պարզաբանմամբ հանդես է եկել ընկերությունը:
ՍԵՎ ԱՐԿՂԵՐԸ ՀԱՅՏՆԱԲԵՐՎԵԼ ԵՆ
Ջրասույզները օգոստոսի 15-ին հայնաբերել են խորտակված Ми-8 ուղղաթիռի սեւ արկղերը, հայտնում է «РИА Новости»-ն: «Սեւ արկղերը հայտնաբերվել են, նրանք գտնվում են իրենց տեղերում: Հաշվի առնելով տեխնիկական դժվարությունները` դրանց ապամոնտաժումը պլանավորվում է անցկացնել երեքշաբթի առավոտյան` ջրից ուղղաթիռի կմախքի դուրսբերումից հետո»,-հայտնել է գործակալության զրուցակիցը: Հիշեցնենք, որ «Արեւելք» ավիաընկերությանը պատկանող Ми-8 ուղղաթիռը խորտակվել էր Ախոտի ծովում Խաբարովսկի շրջանի Օնչագան մարզում: Ուղղաթիռում 13 ուղեւոր է գտնվել, ինչպես նաեւ՝ անձնակազմի 3 անդամ: Վերջին տվյալների համաձայն` 11 մարդ փրկվել է, 5 զոհի մարմինները դուրս են բերվել խորտակված ուղղաթիռից:
ԻՐԱՆԸ ՊԱՏՐԱՍՏ Է
Oգոստոսի 16-ին Իրանում ՀՀ դեսպան Արտաշես Թումանյանը հանդիպել է ԻԻՀ կապի եւ տեղեկատվական տեխնոլոգիաների նախարար Մահմուդ Վայեզիի հետ: Հանդիպման ընթացքում քննարկվել են Հայաստանի եւ Իրանի միջեւ կապի եւ տեղեկատվական տեխնոլոգիաների բնագավառում համագործակցության հարցեր: Նախարար Վայեզիի խոսքով՝ հարեւան երկրների, այդ թվում՝ Հայաստանի հետ հարաբերությունների զարգացումն ու ընդլայնումը Իրանի նախագահ Ռոհանիի կառավարության արտաքին քաղաքականության առաջնահերթություններից է: Դեսպան Թումանյանը նշել է, որ Հայաստանը պատրաստ է ակտիվորեն համագործակցել Իրանի հետ տեղեկատվական տեխնոլոգիաների եւ ճարտարագիտության ոլորտում եւ ակնկալում է իրանական համապատասխան մարմինների աջակցությունը: Նախարար Վայեզին իր լիակատար աջակցությունն է հայտնել ՀՀ դեսպանի առաջարկության կապակցությամբ: Նա նաեւ հավելել է, որ Իրանն ունի մեծ փորձառություն հեռահաղորդակցության, արբանյակային, ենթակառուցվածքային նախագծեր իրականացնելու գործում եւ պատրաստ է այդ ուղղությամբ համագործակցել ինչպես երկկողմ, այնպես էլ տարածաշրջանային այլ երկրների ընդգրկմամբ՝ բազմակողմ ձեւաչափով:
.gif)
