Անտառային ռեսուրսների գործակալության նախկին ղեկավար Վիկտոր Սիվեցի կնոջ՝ Մարինա Ժուրավլյովայի առանձնատունը ձեռք է բերել ՀՀ դեսպան Անդրանիկ Մանուկյանը, փոխանցում է «Corrupt.UA» պարբերականը: Վիկտոր Սիվեցն Ուկրաինայի նախկին նախագահ Վիկտոր Յանուկովիչի մերձավոր պաշտոնյաներից է:
Սեփականության իրավունքների ռեեստրի տվյալների համաձայն, Ժուրավյովային են պատկանում Կիևի Պեչորսկի շրջանի Միչուրինի փողոցի թիվ 29, 31, 33 հասցեներով տներն ու հողատարածքները:
№31 ամենամեծ տունն ունի 1086 քառ մ տարածք: Այսօր առանձնատան դարպասի վրա ցուցանակին գրված է. «Ուկրաինայում ՀՀ դեսպանի նստավայր»: Ընդ որում, նշվում է, որ սեփականության իրավունքների ռեեստրում բացակայում են տան վարձակալության մասին տվայլները:
Դիվանագիտական հարաբերությունների մասին Վիեննայի կոնվենցիայի համաձայն` դեսպանի առանձնատունն անձեռնմխելի է, ինչպես և դեսպանատան տարածքը: Հետևաբար, դրանով Սիվեցը պաշտպանում է իրեն իրավապահերի կողմից խուզարկումից: Նրա կինը ժամանակ առ ժամանակ գործնական այց է կատարում Ուկրաինա և իջևանում այս տանը:
2010թ.-ից Ուկրաինայում ՀՀ դեսպան է Անդրանիկ Մանուկյանը: Նրա նստավայրի տեղի և այնտեղ բնակության ժամկետի մասին հարցումը դեսպանատանն անտեսել են: Վիկտոր Յանուկովիչի փախուստից հետո, ԶԼՄ-ների տվյալների համաձայն, Սիվեցը տեղափոխվել է Մոսկվա:
Հավելենք, որ «Ազատության» հետ զրույցում Ուկրաինայում ՀՀ դեսպան Անդրանիկ Մանուկյանը հերքել է պնդումները, թե ուկրաինացի նախկին պաշտոնյայի առանձնատունն ընտրելով իր նստավայր՝ ապահովել է վերջինիս ունեցվածքի անձեռնմխելիությունը։
«Ես ի՞նչ կապ ունեմ այդ տան հետ։ Ես նախ այդ մարդուն չեմ ճանաչել, ես նրան ոչ տեսել եմ, ոչ գիտեմ ով է»,- ասել է Անդրանիկ Մանուկյանը:
.gif)
