Երևանի քաղաքապետարանի աշխատակազմի հանրակրթության վարչության նախաձեռնությամբ Հովհաննես Իսակովի անվան թիվ 132 դպրոցում անցկացվել է Մայրենի լեզվի միջազգային օրվան նվիրված «Ձոն մայրենիին» խորագրով միջոցառում, որով, ըստ էության, նաև ամփոփվել է «Մայրենին սրբորեն պահպանող մայրերի» ամենամյա մրցույթը: Միջոցառմանը մասնակցել են հանրակրթական մի շարք դպրոցների, ինչպես նաև «Վարդանանք» և «Փոքրիկ իշխան» կրթահամալիրների աշակերտներ ու մանկավարժներ:
Ցերեկույթին ներկա են եղել Երևանի քաղաքապետի տեղակալ Արամ Սուքիասյանը, քաղաքապետարանի աշխատակազմի հանրակրթության վարչության պետ Գայանե Սողոմոնյանը, ՀՀ Սփյուռքի նախարարի տեղակալ Սերժ Սրապիոնյանը:
Միջոցառմանը ներկայացվել են հայ մեծանուն գրողների ստեղծագործություններ, երաժշտական կատարումներ: Փոքրիկ բեմադրությամբ աշակերտները ներկայացրել են նաև իրենց դերասանական հմտությունները: Երաժշտական համարով են հանդես եկել նաև թիվ 35 մանկապարտեզի սաները:
Քաղաքապետի տեղակալ Արամ Սուքիասյանը շնորհավորել է աշակերտներին և կարևորել մայրենիի պահպանմանն ուղղված միջոցառումները:
«Մայրենիի պահպանումը յուրաքանչյուրիս պարտավորությունն է, ուստի ամենքս մեր հերթին պետք է անենք հնարավորը, որպեսզի դարերով մեզ ժառանգություն հասած մայրենին փոխանցենք սերունդներին: Դրանում իր կարևոր դերն ունի նաև ընթերցանությունը: Եվ ուրախությամբ պետք է նշեմ, որ ընթերցողների թիվը, հատկապես դպրոցականների շրջանում, տարեցտարի աճում է, ինչի մասին փաստում են նաև գրադարանների այցելուների տվյալները»,- ընդգծել է Արամ Սուքիասյանը:
Ավանդույթի համաձայն փետրվարի 21-ին՝ Մայրենի լեզվի միջազգային օրը, աշակերտներն այցելել են Օշական և ծաղիկներ խոնարհել Մեսրոպ Մաշտոցի շիրիմին:
Այնուհետ աշակերտները մասնակցել են օրվան նվիրված հանդիսավոր միջոցառմանը: Օշականում անցկացվող միջոցառմանը ներկա են գտնվել ՀՀ փոխվարչապետ Վաչե Գաբրիելյանը, քաղաքապետարանի աշխատակազմի հանրակրթության վարչության պետ Գայանե Սողոմոնյանը և ՀՀ սփյուռքի նախարար Հրանուշ Հակոբյանը:
.gif)
