Կուսակցություններին աուդիտի կենթարկեն

Ապրիլի 10-ին ՀՀ կառավարության նիստում կքննարկվեն մի շարք հարցեր, որոնցից մեկն առնչվում է կուսակցությունների մասին  օրենքում փոփոխություններ անելուն:

Օրենքի համահեղինակները ՀՀԿ-ական պատգամավորներն են, որոնք առաջարկում են, որպեսզի կուսակցության ներսում աուդիտի անցկացման պահանջը գործի ոչ թե ըստ ակտիվների չափի, այլ տարեկան շրջանառու միջոցների սահմանված շեմից բարձր լինելու դեպքում:

Կառավարությունն ի պատասխան առաջարկում է հետևյալը`. «… աուդիտ չի անցկացվում այն դեպ­քում, երբ կու­սակ­ցու­թյունը լիազոր մարմնին հայտարարություն է ներկայացնում հաշվետու տարում կուսակ­ցու­թյան ակտիվների մասով փոփոխությունների բացակայության մասին:

Ներկայացված առա­ջար­կությունը համահունչ է Հայաստանի Հանրապետության կենտրո­նա­կան ընտրական հանձնաժողովի հիշյալ որոշման պահանջներին, ինչպես նաև Հայաս­տա­նի Հանրապե­տու­թյան կառավարության 2009 թվականի հոկտեմբերի 8-ի N 1272-Ն որոշ­ման դրույթներին:

Ելնելով շարադրվածից` Հայաստանի Հանրապետության կառավարությունը ներ­կա­յաց­­­ված օրենքի նախագիծն ընդունելի կհամարի իր կողմից ներկայացված առաջար­կու­թյան ընդունման դեպքում»:

Կառավարության այս նիստում  կքննարկվի նաև ԲՀԿ պատգամավոր Լյովա Խաչատրյանի` «Արարատյան հարթավայրի ստոր­եր­կրյա ջրերի վերականգնման, պահպանման, վերարտադրման և օգտագործման միջոցառում­նե­րի տարեկան  համալիր ծրագրերը հաստատելու մասին» Հայաստանի Հանրա­պե­տու­­թյան օրեն­ք­ի նա­խագիծը, որին   կառավարությունը տվել է դրական եզրակացություն ՝  միաժամանակ առաջարկելով համագործակցել Հայաստանի Հանրապետության կառավարության հետ մեկ միաս­նա­կան նախագծերի փա­թեթ ՝ Հայաս­տանի Հանրապետության Ազգային ժողովի քննարկ­մանը ներկայացնելու հա­մար:

Հիշեցնենք, որ վերջին շրջանում բնապահպաններն ահազանգում են Արարատյան հարթավայրում տիրող աղետալի վիճակի` մասնավորապես Արարատյան դաշտավայրում քաղցրահամ ջրերի օգտագործման ծավալների նվազման մասին, որի պատճառը ձկնաբուծական ընկերություններն են:

Տեղեկացնենք, որ նիստը վարելու է փոխվարչապետ Արմեն Գևորգյանը:

 Սոնա Դավթյան