Իրանը պնդում է, որ ստեղծել է նոր հզոր թևավոր հրթիռ

Իրանի պետական լրատվամիջոցների փոխանցմամբ, զինված ուժերը հաջողությամբ փորձարկել են նոր թևավոր հրթիռ, որի հեռահարությունը հազար 350 կիլոմետր է:

«Փորձարկումը հաջողությամբ է պսակվել: «Հովեիզեհ» հրթիռն անցել է հազար 200 կիլոմետր և խոցել է ուսումնական թիրախը», – Թեհրանի հեռուստատեսությամբ հայտարարել է Իրանի պաշտպանության նախարար Ամիր Հաթամին:

Նրա փոխանցմամբ, «հրթիռն ամբողջությամբ արտադրվել է Իրանում՝ առանց օտարերկրացիների օգնության»:

Այս օրերին Իրանում նշում են մահմեդական հեղափոխության հաղթանակի 40-ամյակը:

Հայտարարելով 2015 թվականին Իրանի հետ գերտերությունների կնքած միջուկային պայմանագրից դուրս գալու և պատժամիջոցները վերականգնելու մասին, Միացյալ Նահանգներն ի շարս այլ հանգամանքների՝ նշել է, որ այդ փաստաթուղթը չի կանխել Իրանում նոր հրթիռներ ստեղծելու հնարավորությունը:

Դրանք, ըստ Վաշինգտոնի, կարող են ուղղակի հարվածի տակ դնել Իսրայելը:

2015 թվականին ՄԱԿ-ի Անվտանգության խորհուրդն ընդունել է թիվ 2 հազար 231 բանաձևը, որն արգելում է Իրանին 8 տարվա ընթացքում մշակել և արտադրել միջուկային մարտագլխիկ կրելու կարողությամբ հրթիռներ:

Թեհրանը պնդում է, որ իր հրթիռները միջուկային զենք կրելու հնարավորություն չունեն:

Իրանի այսօրվա հայտարարությունը, նոր հրթիռ փորձարկելու մասին, անկախ աղբյուրների կողմից դեռ չի հաստատվել: