Ով որ պաշտոնով անուն, հարստություն է ձեռք բերել, նա այդ պաշտոնի համար ամեն ինչ կտա, կծախի՝ կնիկ, երեխա․ Վարդան Ղուկասյան

Այս աշուն Գյումրիում կկայանան տեղական ինքնակառավարման մարմինների (ՏԻՄ) ընտրություններ, որոնք արդեն երկրորդ անգամ կանցկացվեն համամասնական ընտրակարգով։ Առաջադրումներն արդեն սկսվել են: Գյումրիում կայանալիք ընտրություններում կուսակցության համամասնական ցուցակը կգլխավորի Շիրակի մարզպետ, ՔՊԿ անդամ Հովհաննես Հարությունյանը:
Իսկ մինչ այս, լուրեր էին շրջանառվում այն մասին, որ քաղաքապետի ընտրություններին առաջադրվելու է նաեւ Գյումրու նախկին քաղաքապետ Վարդան Ղուկասյանը: ArmLur.am-ը զրուցել է Վարդան Ղուկասյանի հետ եւ հետաքրքրվել՝ ի վերջո առաջադրվելու է, թե ոչ, եթե ոչ ապա ում թեկնածությունն է պաշտպանելու կայանալիք ընտրություններին:

-Պարո՛ն Ղուկասյան, ի՞նչ եք որոշել՝ առաջադրելու եք ձեր թեկնածությունը, թե ոչ:

-Այնպես մի օրենք ձեւավորեցին նախկին ղեկավարները, որ անհատն իրավունք չունի առաջադրելու իր թեկնածությունը, եւ ինքը պետք է անպայման որեւէ մի կուսակցությունից առաջադրվի. մարդիկ էլ այսօր դառնում են էս կուսակցությունից, էն կուսակցություն, այսինքն պետք է փչանան անպայման: Եթե իրենք կուսակցական էլ չեն, պետք է գնան անպայման մի կուսակցություն մտնեն, որ գնան դառնան քաղաքապետ, ավագանի: Դիտավորյալ այնպես արեցին, որ ամբողջությամբ դա էլ իշխվի պետական կառույցների, այլ ոչ թե ժողովրդի կողմից: Սա ինքնակառավարում չէ, սա պետական կառավարում կարելի է կոչել, թե չէ ոնց կարող է դա այդպես լինի: Այդ օրենքի հետ կապված ես բազմաթիվ անգամ Ազգային ժողովում հա ասում էի, բանի տեղ դնող չկար: Հիմա՝ կառաջադրեն, կհրամայեն, կտանեն, կանցկացնեն, բաներ կանեն… չկա, անցավ գնաց, ինքնակառավարումը անցավ: Եթե անհատ կա, պետք է ողջունել նրան, ոչ թե ճանապարհը փակել:

-Արդեն հայտնի է, որ Գյումրիում կայանալիք ընտրություններում կուսակցության համամասնական ցուցակը կգլխավորի Շիրակի մարզպետ, ՔՊԿ անդամ Հովհաննես Հարությունյանը: Եթե չառաջադրվեք, ապա ում թեկնածությունն եք պաշտպանելու:

-Ես չգիտեմ ում թեկնածությունը կպաշտպանեմ կամ ինչ կանեմ կամ ընդհանրապես հեռու կմնամ, չգիտեմ որն է ավելի ճիշտ: Այսօր քաղաքական ի՞նչ դաշտ կա, որ դրա մեջ մարդ մտնի, ես ինձ ափսոսում եմ, ես ինձ հարգում եմ, ովքեր որ պաշտոնով անուն, հարստություն է ձեռք բերել, նրանք այդ պաշտոնի համար ամեն ինչ կտան, կծախեն՝ կնիկ, երեխա, բայց ով, որ առանց դրա տղամարդ է եղել, տղա է եղել, անուն ունի, պաշտոնից դուրս գալուց հետո էլի անուն ունի, ամեն ինչ ունի, դրա ցավը տանեմ… այդպիսի մարդկանցից մեկը ես եմ: Ես առանց պաշտոնի տղա եմ, հզոր մարդ եմ, ի՞նչ է եղել:

-Խոսակցություններ են պտտվում նաեւ այն մասին, որ Սամվել Բալասանյանի անունը եւս չի լինելու առաջադրվող թեկնածուների ցանկում… Շրջանառվող մյուս լուրը՝ ՔՊ-ի քաղաքապետի թեկնածուն օլիմպիական չեմպիոն Արթուր Ալեքսանյանն է կամ նրա հայրը՝ Գևորգ Ալեքսանյանը։

-Սամվել Բալասանյանն ո՞վ է, որ իրենից ի՞նչ է ներկայացնում, նա 7 ձայն չուներ անգամ, վերջը լավ լինի… Աստված իրենց հետ, թող գնան ապրեն: Ես Արթուր Ալեքսանյանին հարգում եմ, փոքրուց ճանաչում եմ, ես օրինակ հեչ չէի ուզի, որ ինքը առաջադրեր իր թեկնածությունը, չեմ հավատա, որ առաջադրվի: Ինքը պետք է հեռու մնա էս անբարոյական քաղաքականությունից, հիմա էլ իրեն բերեն վարկաբեկեն: Եթե ինձնից խորհուրդ հարցնի՝ ես կասեմ հեռու մնա այս քաղաքականությունից:

-Հիմա՝ ձեր մասով ի՞նչ որոշում եք կայացրել:

-Աղջիկ ջան, իմ ճանապարհները սրանք փակում են, էն գլխուց փակում են, իրենք գիտեն, որ ես դրեցի ամբողջ ժողովուրդն իմ հետեւից կգա, իրենք փակում են: Նմանատիպ մարդիկ այս երկրում տեղ չունեն, իրենց վարկաբեկում են, խայտառակում, կրիմինալ հանցագործություն կամ ինչ ասես սարքում են, եթե որեւիցե մեկի հետեւից ժողովուրդ է գնում: Ուժեր կան, որ պետք է խայտառակեն, իրենք որպես այլասերված, խայտառակված անձինք չեն թողնում նմանատիպ մարդկանց իսկական գնան առաջ, հայրենասերը, հավատք, խիղճ ունեցողը տեղ չունի, այդպես է, չե՞ս հասկանում: Կգրես այդպես:

Զրուցեց Սյունէ Համբարձումյանը