Հայկ Մարությանի քաղաքական ստենդափը գրեթե պատրաստ է. «Հրապարակ»

«Հրապարակ» թերթը գրում է. «Հայկ Մարությանի քաղաքական ստենդափը, որի մասին գրել էինք, գրեթե պատրաստ է։ Նախնական պայմանավորվածություն է ձեռք բերվել Սունդուկյանի բեմում ներկայացնելու։ Մարությանին մոտ կանգնած աղբյուրը պատմում է, որ նա ի սկզբանե մտադիր չի եղել մոնոներկայացում բեմադրել, ցանկացել է նախկին կոլեգաներին ներգրավել՝ «Յոթ ու կեսի» տիպի զիլ ներկայացումով հանդես գալ։ Սակայն նախկին ընկերները մերժել են, քանի որ քաղաքապետ եղած շրջանում նա ոչ մեկի զանգին չի պատասխանել, ոչ մեկին ոչ մի հարցում չի ընդառաջել, նրանից նեղացած են։ Ուստի որոշել է միայնակ բեմ բարձրանալ՝ Վարդան Պետրոսյանի նման։ Ներկայացումն իրականում քաղաքական մուտքի նախերգանքն է լինելու, քաղաքական դաժան քննադատություն՝ ուղղված նախկին գործընկերներին՝ ՔՊ-ին։ Սակայն մի մասին ավելի շատ է թիրախավորելու, քան մյուսներին։

Օրինակ, Նիկոլ Փաշինյանին հնարավորինս կխնայի, քանի որ դա կարող է իր համար վատ «հետեւանքներ» ունենալ, փոխարենը կոշտ քննադատության կարժանանան մյուսները, առաջին հերթին՝ Ալեն Սիմոնյանը, եւ բոլոր նրանք, ովքեր չպաշտպանեցին իրեն։ Մարությանը հույս ունի այս ներկայացմամբ այնպիսի քաղաքական ֆուրոր անել, որ իր շանսերը՝ որպես Երեւանի քաղաքապետի թեկնածուի, աճեն։ Նա առաջադրվելու է, սակայն թե որ կուսակցության ցուցակով՝ հայտնի չէ։ Ընդդիմադիրները կասկածներ ունեն, որ այս պրոյեկտի հետեւում Տիգրան Ավինյանն է, որը քաղաքապետի ՔՊ-ական թեկնածուն է։

Մարությանն ընդդիմությունից ձայներ կտանի, ինչը կաշխատի Ավինյանի օգտին։ Ակնհայտ է, որ Մարությանը չի լինելու ընդդիմության միասնական թեկնածուն, միեւնույն ժամանակ նրան ձայն տվողները չեն լինելու իշխանության համակիրները։ Իսկ եթե ընդդիմությունը մի քանի թեկնածու առաջադրի, ապա այս ծրագիրը հոյակապ արդյունք կտա»:

Ամբողջությամբ հոդվածը` օրաթերթի այսօրվա համարում