Չեչնիայի ղեկավար Ռամզան Կադիրովն իր 16-ամյա որդուն՝ Ադամին, նշանակել է Վլադիմիր Պուտինի անվան ռուսական հատուկ նշանակության ուժերի համալսարանի կուրատոր։
Նա «Տելեգրամ»-ի իր ալիքում հայտնել է, որ որոշումը կայացրել է ուսումնական հաստատության ղեկավարի խնդրանքով։
«Իմ սիրելի եղբոր՝ Ռուսաստանի հատուկ նշանակության ուժերի համալսարանի ղեկավար Բայբեթար Վայխանովի խնդրանքով ես որոշեցի Ադամ Կադիրովին նշանակել Ռուսաստանի հատուկ նշանակության ուժերի համալսարանի կուրատոր։ Նա մոտիկից ծանոթ է հայտնի համալսարանի գործունեությանը, ուստի կարծում եմ, որ շատ լավ կկատարի իր վրա դրված պարտականությունները»,- գրել է Կադիրովը Գուդերմեսի համալսարանում «Մեր ժողովուրդը» մարտավարական հրաձգության մրցույթի բացումից հետո։
2023 թվականի աշնանը 25-ամյա Ադամ Կադիրովը քննչական մեկուսարանում ծեծի էր ենթարկել Ղուրանը այրելու համար մեղադրվող Նիկիտա Ժուրավելին։ Ռամզան Կադիրովը ծեծի տեսանյութը հրապարակել էր՝ ասելով, որ իր որդին «ճիշտ է վարվել»։ Ավելի ուշ Չեչնիայի ղեկավարը նշել էր, որ «լավ կլիներ, որ սպաներ նրան»։ Կրեմլը հրաժարվել էր մեկնաբանել իրավիճակը։
Միջադեպից հետո Ադամ Կադիրովը սկսել էր տարբեր մրցանակներ ստանալ։ Նրան շնորհվել է Չեչնիայի հերոսի կոչում, հռչակվել է բոլոր մահմեդականների հերոս և պարգևատրվել «Կարաչայ-Չերքեսիային ծառայությունների համար», «Ումային մատուցած ծառայությունների համար» 1-ին աստիճանի, «Կաբարդինո-Բալկարիայի Հանրապետությանը մատուցած ծառայությունների համար» շքանշաններով, «Դուսլիկ» (Թաթարստանի երկրորդ կարևորագույն կարգը) կոչումով:
Ադամ Կադիրովն իր երկու եղբայրների հետ ստացել է Չեչնիայի խորհրդարանի «Դայմեխկան Սիյ» բարձրագույն շքանշանը։ Դեռահաս Ադամ Կադիրովը ստացել է նաև Ռուսաստանի Աշխատանքային արիության շքանշան և համալսարանների Եվրասիական ասոցիացիայի մեդալ։
.gif)
