Երկրապահ կամավորական միությունը տարիներ առաջ այնպիսի անհրաժեշտություն էր, որ հավատալ-չհավատալու խնդիր չի եղել: Armlur.am-ի հետ զրույցում խոսելով ԵԿՄ-ի ստեղծման անհրաժեշտության մասին` նշեց «Հանրապետություն» կուսակցության ղեկավար Արամ Զավենի Սարգսյանը:
Նա մեզ հետ զրույցում կիսվեց միության մասին իր հիշողություններով, նշեց Վազգեն Սարգսյանի` ԵԿՄ ղեկավար դառնալու անհրաժեշտությունը:
«Շատ լավ հիշում եմ, թե ինչպես ձևավորվեց, շատ լավ հիշում եմ առաջին համագումարը, նորաստեղծ ջոկատների սխրանքը: Այդ ժամանակ սահմանի ամբողջ երկայնքով եղան ռազմական գործողություններ: Եվ հենց այդ շրջանում պետք է լիներ մեկը, ով կկարողանար համակարգել այդ ամբողջ աշխատանքը: Այստեղ պետք է Վազգենը լիներ միանշանակ: Լիդեր լինելը, էքստրեմալ իրավիճակներում արագ որոշումներ կայացնելու կարողությունը բերեց նրան, որ հենց նա լինի լիդեր: Այստեղ քննարկում չի էլ եղել», – նշեց նա:
Արամ Սարգսյանն ընդգծեց, որ կարծիքների բախում եղել է, և հենց այստեղ է մեծ եղել Վազգեն Սարգսյանի դերը:
«Կարծիքների բախում սկսվեց այն ժամանակ, երբ զուգահետ սկսեցին գործել ազատամարտիկների այլ ջոկատներ: Կային ազատամարտի հագուստ կրող անձինք, ովքեր փորձում էին շահել այդ ամենից: Եվ այդ ամենի հարցերը պետք է լուծեր հենց ԵԿՄ-ն», – ընդծեց նա:
Խոսելով տարիների ընթացքում ԵԿՄ-ի դերի մասին` Արամ Սարգսյանն ասաց, որ փորձել են հնազանդեցնել այդ կառույցը, սակայն չի ստացվել:
«Հոկտեմբերի 27-ից հետո Ռոբերտ Քոչարյանն ու իր իշխանության մեջ գտնվող տարբեր քաղաքական գործիչներ, ներառյալ` այսօրվա նախագահը, փորձել են բազմաթիվ ազատամարտիկների բազմաթիվ միություններ ստեղծել, որ էս կառույցը հնազանդեցնեն, որ էս կառույցը դնեն էն հունի վրա, ինչ իրենք են ուզում: Բայց, բարեբախտաբար, դրանք որևէ արդյունք չեն տվել:
Հիմա էլ ԵԿՄ-ի հավերժ նախագահը Վազգեն Սարգսյանն է, հիմա էլ ԵԿՄ-ի անդամները Վազգենի ընկերներն են ու իր մահվանից 15 տարի հետ էլ հիշում են նրան», – նշեց նա:
.gif)
