Ինչպես տեղեկացանք ԼՂՀ նախագահի թեկնածու Վիտալի Բալասանյանի նախընտրական շտաբից, շուրջ 1 ժամ առաջ ԿԸՀ դիմում է ներկայացվել արձանագրված խախտումների վերաբերյալ:
Շտաբի պետ Էդուարդ Աղաբեկյանի փոխանցմամբ՝ այսօր առավոտյան ժամը 11:00-ի սահմաններում Շահումյանի շրջանի Նոր Էրքեջ գյուղի թիվ 10 ընտրատեղամասում խախտում է գրանցել Վիտալի Բալասանյանի վստահված անձը. տեղամասային ընտրական հանձնաժողովի նախագահ Արմինե Հովհաննիսյանը 2 հոգու հետ մտել է քվեախուց, իսկ մեկ բնակչի թույլատրել են քվեարկել անձնագրի պատճենով: Արձանագրությունը տեղում կազմվել է, սակայն հանձնաժողովի անդամները չեն ցանկանում ստորագրել արձանագրության տակ: Խախտումը վստահված անձը նաեւ նկարահանել է:
Ի դեպ, երեկ Ասկերանի շրջանի Աստղաշեն գյուղում Վիտալի Բալասանյանի վստահված անձ Արսեն Գրիգորյանի նկատմամբ բռնություն է գործադրվել. նրան մոտեցել են գյուղի դպրոցի տնօրեն Սլավիկ Գրիգորյանը եւ գեներալ-մայոր Արմեն Ղահրամանյանը, հարցրել, թե ինչու է համաձայնվել ՎիտալիԲալասանյանի վստահված անձ լինել: Վստահված անձի պատասխանից հետո Արմեն Ղահրամանյանը 2 անգամ հարվածել է Արսեն Գրիգորյանին, իսկ այսօր էլ, երբ ընտրատեղամսսը բացվել է՝ նա Բակո Սահակյանի վստահված անձ Անդրանիկ Ղահրամանյանի միջոցով փոխանցել է, որ Արսեն Գրիգորյանը լքի ընտրատեղամասը:
“Համանման ճնշումներ կան նաեւ Խնածախի վստահված անձի նկատմամբ: Մանրամասները ճշտվում են”,-նշվում է բողոք-դիմումի մեջ:
.gif)
