Վայոց Ձորի Արտավան և Սարավան համայնքների հարակից տարածքում 2017 թվականի օգոստոսի 10-ին, ինչպես նաև Արարատի մարզի «Խոսրովի անտառ» պետական արգելոց ՊՈԱԿ-ի «Զիմի» կոչվող տարածքում երկու օր անց հրդեհ էր բռնկվել և զգալի տարածում գտել խոտածածակ և անտառածածակ տարածքներում:
Հրդեհաշիջման աշխատանքներին ներգրավվել էին ՀՀ ԱԻՆ փրկարար ծառայության ուժերը: Կազմակերպվել էր հերթափոխային ծառայություն 4 հերթափոխով և յուրաքանչյուր օր հերթափոխում ներգրավվել էր 95 փրկարար ծառայողներ, ընդհանուր թվով 380 մարդ:
Հրդեհաշիջման ընթացքում անհրաժեշտություն էր առաջացել ձեռքբերել, փրկարար ծառայողներին ապահովել շարժական հրդեհաշիջման միջոցներով, կազմակերպել փրկարար ծառայողների սննդի հարցը: Աշխատանքների իրականացման ընթացքում բարդ տեղանքային պայմանների պատճառով շարքից դուրս էին եկել հրշեջ-հատուկ ավտոմեքենաները, հրդեհաշիջման ընթացքում բարձր ջերմաստիճանի ազդեցության հետևանքով հետագա օգտագործման համար ոչ պիտանի էին դարձել հրշեջ-փրկարարների պաշտպանիչ և ամենօրյա հանդերձանքը և այլն:
Հրդեհի հիմնական օջախները չեզոքացնելուց հետո հրդեհաշիջման աշխատանքները շարունակվել էին մինչև 2017 թվականի օգոստոսի 29-ը:
ArmLur.am-ը տեղեկացավ, որ ՀՀ կառավարությունը որոշել է, որ անտառային հրդեհաշիջման աշխատանքների կատարման ժամանակ փրկարար ծառայողներին հատկացվող հանդերձանքի, սննդամթերքի և տրանսպորտային միջոցների՝ վառելանյութի, շարքից դուրս եկած տեխնիկայի և ավտոմեքենաների վերանորոգման հետ կապված ծախսերը փոխհատուցելու նպատակով Հայաստանի Հանրապետության 2017 թվականի պետական բյուջեով նախատեսված Հայաստանի Հանրապետության կառավարության պահուստային ֆոնդից ՀՀ արտակարգ իրավիճակների նախարարությանը հատկացնել 38 602.3 հազար դրամ:
.gif)
