Ողբերգական ավտովթարի գործով «Տոյոտայի» վարորդը կալանավորվեց

Ինչպես հայտնի է, նախաքննական մարմինը այսօր միջնորդություն էր ներկայացրել դատարան Արարատի մարզում ողբերգական ավտովթարի դեպքով հարուցված գործով «Տոյոտա Հիլուքս»-ի վարորդ Սողոմոն Հակոբյանին կալանավորելու մասին: Արդյունքում քիչ առաջ ArmLur.am-ին հայտնի դարձավ, որ դատարանը բավարարել է միջնորդությունը: Նշենք, որ վերջինս դեռ գտնվում է հիվանդանոցում:

Հիշեցնենք, որ վթարը տեղի էր ունեցել հուլիսի 6-ին՝ ժամը 15:00-ի սահմաններում. Երեւան-Մեղրի ավտոճանապարհի 54-րդ կիլոմետրի հատվածում՝ Արարատի մարզի Արարատ քաղաքի Զոդի կամրջի վրա բախվել են «Գազել», «Տոյոտա Հիլուքս» եւ «ՎԱԶ 21063» մակնիշի ավտոմեքենաները, որի արդյունքում հրդեհ է բռնկվել «Գազել» մակնիշի ավտոմեքենայում, այնուհետեւ հրդեհը տարածվել է «Տոյոտա Հիլուքս» մակնիշի եւ «ՎԱԶ 21063» մակնիշի ավտոմեքենաներում, ինչի հետեւանքով ստացած այրվածքներից «Գազել» մակնիշի ավտոմեքենայի վարորդը և վերջինիս հինգ ուղեւորները տեղում մահացել են: «Գազել»-ում գտնվող մյուս ուղեւորները, ինչպես նաեւ «Տոյոտա Հիլուքս» մակնիշի ավտոմեքենայի վարորդը եւ ուղեւորները՝ ընդհանուր թվով 11 մարդ, մարմնական տարբեր վնասվածքներով տեղափոխվել են բժշկական կենտրոններ: