34 տարի պաշտոնավարած, քրեական անցյալ ունեցող համայնքապետին ուզում են նորից պաշտոնի բերել. գյուղացիները բողոքի ակցիա են իրականացնում

Արմավիրի մարզի Եղեգնուտ համայնաքում վաղ առավոտից բողոքի ակցիա են իրականացնում գյուղի բնակիչները։ Նրանք դեմ են նախկին համայնքապետ Ռազմիկ Մարգարյանի վերադարձին։

Armlur.am-ի հետ զրույցում ակցիայի մասնակիցներից Աշոտն ասաց, որ այս պահին ոստիկանության բաժնում են և պատրաստվում են նախկին համայնքապետի արարքների վերաբերյալ հանցագործության մասին հաղորդում ներկայացնել: «Նախկինում 20-30 կետից բաղկացած ցուցմունք ենք տվել, սակայն նա համաներման է արժանացել: Հիմա նորից հաղորդում ենք տալիս»,-ասաց ակցիայի մասնակիցը:

Եղեգնուտի համայնքի ղեկավարի ժամանակավոր պաշտոնակատար Ռազմիկ Մկրտչյանն էլ հայտնեց, որ գյուղը միշտ անհաշտ է եղել, և դրա պատճառն եղել է 34 տարի պաշտոնավարած համայնքապետը: «Հիմա դատարանը որոշել է ժամանակավոր պաշտոնակատարի վերաբերյալ մարզպետի որոշումն անվավեր ճանաչել, սակայն ժողովուրդը խաղաղություն է ուզում: Այս ընթացքում ամենամեծ ձեռքբերումն այն է եղել, որ գյուղում հաստատվել է խաղաղություն, համերաշխություն, իսկ իր ժամանակ նսեմացնում էին գյուղացիներին, ծեծ ու ջարդ էր»,-Armlur.am-ի հետ զրույցում ասաց Ռազմիկ Մկրտչյանն ու հայտնեց, որ 8 ամսում 14 կմ ջրագիծ են փոխել, շուրջօրյա ջրամատակարարում ունեն, տարբեր ծրագրերի են մասնակցում և ամբողջ գյուղը ներառել են արևային էներգիայի LED համակարգում: Մկրտչյանի խոսքով, Մարգարյանը քրեական անցյալ ունի, «Հայաստանի հանրապետական» կուսակցության անդամ է եղել, սակայն նրան ցանկանում են կրկին նշանակել համայնքի ղեկավարի պաշտոնում:

«Գյուղացիները այժմ Մարգարյանի վերաբերյալ նոր փաստեր են գտել, որոնցից է օրինակ այն, որ Սուրիկ Խաչատրյանի եղբորորդուն սեփականության իրավունքով 10 հեկտար ու կես հող է վաճառել, որի համար 600 հազար դրամ է վերցրել»,-ամփոփելով խոսքն ասաց Եղեգնուտի համայնքի ղեկավարի ժամանակավոր պաշտոնակատար Ռազմիկ Մկրտչյանը:

Հիշեցնենք, որ դեռ 2018թ-ին Արմավիրի մարզի Եղեգնուտ գյուղի բնակիչները պահանջում են իրենց 32 տարվա գյուղապետ Ռազմիկ Մարգարյանի հրաժարականը: Համագյուղացիների ճնշմամբ Մարգարյանը լիազորությունները վաղաժամկետ դադարեցնելու դիմում էր ներկայացրել:

Սոնա Գևորգյան