ՇՈՈՒԲԻԶՆԵՍԻ ՆԵՐԿԱՅԱՑՈՒՑԻՉՆԵՐԻՑ ՈՎՔԵ՞Ր ԵՆ ԱՌԱՋՆԱԳԾՈՒՄ, ԵՎ ՈՎՔԵ՞Ր ԵՆ ՎԻՐԱՎՈՐՎԵԼ ՄԱՐՏՈՒՄ

Պատերազմական այս օրերին հայրենիքի նկատմամբ իրենց պարտք են կատարում նաեւ մի շարք հայտնի մարդիկ, մշակութային գործիչներ, երգիչներ,  որոնք, բացի մարդասիրական օգնությունից, զենք են վերցրել եւ մեկնել առաջնագիծ:

Երգիչ Արսեն Սաֆարյանն այս մասին հայտնել է ընդամենը մեկ նախադասությամբ. «Մենք գնացինք»: Մեկնաբանություններում Արսեն Սաֆարյանն օգտագործել է մի շարք հեշեթգեր՝ «Ուժեղ Արցախ», «Դադարեցրե՛ք Ադրբեջանի ագրեսիան»։

Իսկ, ահա, դերասան, շոումեն Վաչե Թովմասյանի եղբայրը՝ Վահան Թովմասյանը, որը հանրությանը հայտնի է «Բանակում» հեռուստասերիալից, որտեղ մարմնավորում էր Մակարյանի կերպարը, որպես կամավոր, առաջնագիծ է մեկնել պատերազմի առաջին իսկ օրվանից:

Եղբոր պատրաստակամության եւ խիզախության մասին Վաչե Թովմասյանը մասնավորապես գրել է. «Երբ ամբողջ օրը շունչդ պահած հետեւում ես բոլոր հնարավոր լուրերին, երբ քուն չկա, մղձավանջ է միայն, թվում է` գիշերվա կեսին դեմդ թռած էս կադրը` Ստեփանակերտի սրտում արված, սիրտդ պիտի կիսի վերջնական, տակնուվրա անի, բայց, արի ու տես, հակառակն է լինում: Ու հենց էդ չեն հասկանում էս փսլնքոտ բորենիները: Ախր, ամեն կորստից մենք ավելի ենք հզորանում, ամեն պայթյունից է՛լ ավելի է ամրանում հայի ոգին, ու նորից նոր օրվա համար էնքան ուժ է գալիս, որ մինչեւ վերջին օրն էլ կհերիքի… իրե՛նց վերջին, իսկ մերը` երբեք, մենք դատապարտված ենք հաղթելու ու հաղթելու ենք: Սիրտս ախպորս մոտ է, խնդրել եմ՝ կտոր-կտոր բաժանի բոլոր տղեքին իր կողքի: Խոնարհված մեր հին ու նոր հերոսների առաջ, հոգիս փռած մեր սահմանին` ասում եմ` ուժեղ ենք, քան երբեւէ»,-գրել է նա:

Կամավոր առաջնագիծ մեկնելու ցանկություն էր հայտնել նաեւ դերասան, շոումեն Աղաս Մանուկյանը, ում թեեւ չի հաջողվել մեկնել սահման, բայց այժմ հանդես է գալիս մարդասիրական տարբեր նախաձեռնություններով:

Երեկ ռեփեր Արշոն հայտնել է, որ ռազմաճակատում հայրենիքի պաշտպանության համար վիրավորվել է դերասան Հայկ Չոմոյանը, որը այժմ գտնվում է Երեւանի հիվանդանոցներից մեկում:

«Մեր հերոս ընկեր Հայկ Չոմոյանը, իմ հերոս ընկեր, քաջարի մարտիկ Հայկս: Հայ ազգին արժանի զավակ ու տղա մեծատառով: Շուտ ոտքի կանգնես, ես հերոս ընկեր ունեմ»,- գրել է նա եւ լուսանկարներ հրապարակել Հայկի հետ: Պատերազմի առաջին իսկ օրվանից, որպես կամավոր, մեկնել է Արցախ նաեւ ՀՀ վաստակավոր արտիստ Հրանտ Թոխատյանը, Բաբկեն Չոբանյանը, որը թիկունքում անում է անհնարինը մեր տղաներին աջակցելու համար: ՍԵպտեմբերի 27-ին ծանր վիրավորվել էր նաեւ երիտասարդ դերասան, ժամկետային զինծառայող Վահագն Սամվելյանը, որը նոր է դուրս եկել կոմայից, եւ ինչպես հայտնում են ընկերները, վերջինիս սպասվում է երկարատեւ բուժում:

Ռազմաճակատում բեկորային վիրավորումներ են ստացել նաեւ  դերասան Գեւորգ Գրիգորյանը, Էրիկ Օհանյանը, երգիչ Մկրտիչ Մկրտչյանը:

ԼԻԴԱ ԵՂԻԱԶԱՐՅԱՆ

ԶՈՐԱԿՑՈՒԹՅՈՒՆ Է ՀԱՅՏՆԵԼ

Աշխարհի տարբեր ծայրերում ապրող բազմաթիվ երաժիշտների, դերասանների եւ արվեստի ոլորտի այլ ներկայացուցիչների նման հանրաճանաչ իսրայելցի ջութակահար Սերգեյ Օստրովսկին եւս իր զորակցությունն է հայտնել Հայաստանին եւ Արցախին՝ անդրադառնալով Ադրբեջանի՝ Արցախի դեմ սանձազերծած ռազմական գործողություններին:

Երաժշտի արձագանքը հրապարակված է Հայաստանի ազգային ֆիլհարմոնիկ նվագախմբի «Ֆեյսբուքի» պաշտոնական էջում: Օստրովսկին ընդգծել է, թե անսահման մտահոգված է, որ նորից Թուրքիան Ադրբեջանի միջոցով հարձակվել է Հայաստանի, Լեռնային Ղարաբաղի վրա ու ռմբակոծում է հայկական քաղաքներն ու բնակչությանը։ «Ես շատ հիասթափված եմ, որ իմ երկիրը զինամթերք է վաճառում Ադրբեջանին։ Բիզնեսը պետք է ունենա գոնե մի քիչ բարոյական արժեքներ։  Վե՛րջ տվեք Ադրբեջանի ագրեսիային եւ աջակցե՛ք Հայաստանին»,-շեշտել է նա  ու օգտագործել՝ #MusiciansForPeace, #StrongArtsakh, #RecognizeArtsakh հեշթեգերը:

Հիշեցնենք, որ սեպտեմբերի 27-ից Ադրբեջանը Թուրքիայի աջակցությամբ ռազմական գործողություններ էր սանձազերծել Արցախի դեմ՝ կիրառելով ողջ զինանոցը, թիրախավորելով անգամ քաղաքացիական բնակչությանը թե՛ Արցախում, թե՛ Հայաստանում: Առկա են հաստատված տեղեկություններ, որ Ադրբեջանի զինուժի կազմում հայկական կողմի դեմ մարտեր են մղում նաեւ Թուրքիայի միջոցով Սիրիայից բերված վարձկաններ: Ադրբեջանն անտեսել է անգամ հոկտեմբերի 10-ից Ռուսաստանի Դաշնության նախագահ Վլադիմիր Պուտինի նախաձեռնությամբ Հայաստանի, Ռուսաստանի եւ Ադրբեջանի արտաքին գործերի նախարարների ձեռք բերած համաձայնությունը՝ կրակի դադարեցման մասին, եւ  պայմանավորվածության՝ ուժի մեջ մտնելուց րոպեներ անց կրակել է Արցախի ուղղությամբ, ձեռնարկել հարձակումներ, հրթիռակոծել առաջնագիծն ու բնակավայրերը:

ՄԵԿՆԱԲԱՆԵԼ Է ՊԱՐՏՈՒԹՅՈՒՆԸ

Իսպանիայի ազգային հավաքականի գլխավոր մարզիչ Լուիս Էնրիկեն մեկնաբանել է Ազգերի լիգայի չորրորդ տուրում Ուկրաինայի հավաքականից կրած պարտությունը: «Մենք լավ հանդիպում չանցկացրինք, գործեցինք սխալներ եւ դրա հետեւանքով կրեցինք պարտություն: Պետք է դասեր քաղենք մեր սխալներից եւ փորձենք չկրկնել դրանք: Արդեն սովորություն է դարձել պարտությունների համար մեղադրել Դե Խեային: Պետք չէ անել այդպես, քանի որ պարտության համար պատասխանատու են բոլորը»,- Էնրիկեի խոսքը փոխանցում է Goal.com-ը:

Հիշեցնենք, որ Իսպանիայի հավաքականը պարտություն էր կրել Ուկրաինայից 0:1 հաշվով:

ՀԱՂԹԱՆԱԿ Է ՏԱՐԵԼ

2022 թվականի աշխարհի առաջնության ընտրական փուլում տեղի են ունեցել երկրորդ տուրի հանդիպումները: Արգենտինայի հավաքականը Լաուտարո Մարտինեսի եւ Խոակին Կորեայի խփած գոլերի շնորհիվ 2:1 հաշվով հաղթանակ է տարել Բոլիվիայի ընտրանու նկատմամբ: Բոլիվիայի միակ գոլը խփել է Մարսելո Մորենոն: Ուրուգվայը հյուրընկալվելիս 2:4 հաշվով պարտություն է կրել Էկվադորից: Հյուրերի կազմից դուբլ է ձեւակերպել Լուիս Սուարեսը, իսկ Էկվադորի կազմից դուբլի հեղինակ է դարձել Մայքլ Էստրադան, գոլեր են հեղինակ Մոյսես Կայսեդոն եւ Գոնսալո Պլատան:

Չիլի-Կոլումբիա հանդիպումն ավարտվել է ոչ ոքի՝ 2:2 հաշվով: Չիլիի կազմից գոլերի հեղինակ են դարձել Ալեքսիս Սանչեսն ու Արտուրո Վիդալը, իսկ Կոլումբիայի կազմից գոլեր են հեղինակել Հեֆերսոն Լերման եւ Ռադամել Ֆալկաոն:

ՊԵՏՔ Է ՎԵՐԱԿԱՆԳՆԻ

Լոնդոնի «Արսենալի» կիսապաշտպան Թոմաս Պարտին նշել է, որ իր թիմի գլխավոր նպատակն ընթացիկ մրցաշրջանում չեմպիոնությունն է Պրեմիեր լիգայում: ««Արսենալը» պետք է վերականգնի այն անունը, որն ունեցել է միշտ: Մենք ամեն ինչ անելու ենք ակումբը Եվրոպայի լավագույն թիմերից մեկը դարձնելու համար: Մեր գլխավոր նպատակն ընթացիկ մրցաշրջանում չեմպիոնությունն է Պրեմյեր լիգայում: Այդ խնդիրն է դրած ակումբի առաջ»,- ասել է Պարտին:

Հիշեցնենք, որ «Արսենալը» վերջին անգամ Անգլիայի չեմպիոն հռչակվել է 2003/2004 մրցաշրջանում՝ Արսեն Վենգերի գլխավորությամբ:

ԻՏԱԼԻԱ Է ՏԵՂԱՓՈԽՎԵԼ

Թոմ Քրուզն Իտալիա Է տեղափոխվել «Առաքելությունն անիրագործելի Է 7» մարտաֆիլմի հետապնդման տեսարաններում նկարահանվելու համար:

Դերասանը Հեյլի Էթվելի (ֆրանշիզայի նորեկը) հետ մեծ արագությամբ Հռոմով ընթանում Է առանց դռների ավտոմեքենայով: Թվիթերյան AP Entertainment օգտահաշվում հայտնվել Է նկարահանման հոլովակը, որում հետապնդման վերջում Թոմ Քրուզը ցատկում Է ոստիկանական մեքենայի վրայով, բացում դուռը եւ Էթվելին օգնում Է այնտեղից դուրս գալ: Վերջին մի քանի օրվա ընթացքում Թոմ Քրուզին արդեն քանիցս տեսել են «Առաքելությունն անիրագործելի Է» ֆիլմի տեսարանների նկարահանությանը:

Դրանից առաջ նա Նորվեգիայում օդապարիկով ցատկել Է մոտոցիկլի վրա եւ անցել շարժվող գնացքի տանիքի վրայով: Դերասանը միշտ ինքն Է կատարում տրյուկները: Ժապավենի համաշխարհային պրեմիերան պլանավորված Է 2021 թվականի նոյեմբերի 17-ին: