ՏԵՍԱՆՅՈՒԹ․ Բացառիկ. Քաղաքագետը գնացել է՝ ապրելու Ոսկեպարում. չի կարելի հայրենիք հանձնել

«Ժողովրդական համախմբում» կուսակցության ղեկավար, քաղաքագետ Սուրեն Պետրոսյանը մեկնել է Տավուշի մարզի Ոսկեպար բնակավայր՝ այնտեղ ապրելու:

Տավուշի մարզի պաշտպանությունը յուրաքանչյուր հայի առաքելությունն է, քանի որ Նիկոլ Փաշինյանը 1 շաբաթ առաջ հանդիպեց սահմանամերձ համայնքների բնակիչների հետ եւ անոնսեց, որ պետք է 4 գյուղեր հանձնվեն: Ցասումն, իհարկե, մեծ է: Հատկապես Արցախի լուռ հանձնումից հետո յուրաքանչյուր բանական քաղաքացի գիտակցում է, որ տարածքային ցանկացած զիջում աղետաբեր կարող է լինել Հայաստանի համար: Սակայն շատերը ցասումն արտահայտում են տանը՝ մի մասը համացանցում, բացառիկ քչերը՝ հենց դեպքի վայրում:

Սուրեն Պետրոսյանը տեղեկացրեց, որ բավականին լուրջ հանդիպում է ունեցել Տավուշի թեմի առաջնորդ Բագրատ Սրբազանի հետ, քննարկել իրավիճակից դուրս գալու ելքերը:

ArmLur.am-ի նկարահանող խումբը երեկ Տավուշի մարզի Ոսկեպար գյուղում եւս  հանդիպեց «Ժողովրդական համախմբում» կուսակցության ղեկավար, քաղաքական գործիչ, քաղաքագետ Սուրեն Պետրոսյանին:

ArmLur.am-ի հետ զրույցում Սուրեն Պետրոսյանն ասաց, որ Ոսկեպար է եկել գյուղի բնակիչների կողքին լինելու համար, կմնա, որոշ ժամանակ կապրի գյուղում՝ թույլ չտալու տարածքային որեւէ հատվածի հանձնում:

Իհարկե, այս ընթացքում տարբեր քաղաքական ուժեր են եղել Ոսկեպարում, հասցրել են բնակիչներին շփոթեցնել, խճճել: Նաեւ վախեցնել, քանի որ տեսախցիկներից խուսափում էին մարդիկ: Բայց Սուրեն Պետրոսյանի հետ նրանք ջերմ զրուցում էին, երբ տեղեկացան, որ իրենց հետ մնալու է գյուղում, կրելու է բոլոր դժվարությունները:

Հիշեցնենք, որ Սուրեն Պետրոսյանն այն գործիչն է, որը 2022-ի օգոստոսին գնացել էր Աղավնո՝ իր ընտանիքի հետ:

Ավաղ, Աղավնոն հանձնվեց եւ վերջինը դուրս եկողը Սուրեն Պետրոսյանն էր՝ իր ընտանիքի հետ, երբ արդեն ոչ մի հայ չկար Աղավնոյում:

Մանրամասները՝ տեսանյութում։

Աննա Սրապիոնյան, Հովսեփ Հովսեփյան