Աշխարհի ամենաուժեղ կինը՝ Ռոնդա Ռոուզին, մարզիչների հետ Հայաստան կգա. նա ցուցադրական մարզումներ կանցկացնի (ֆոտո, վիդեո)

2004թ. ձյուդոյի աշխարհի չեմպիոն, 2007թ. աշխարհի առաջնության արծաթե մեդալակիր, 2007թ. Պանամերիկյան խաղերի հաղթող, 2008թ. Օլիմպիական խաղերի բրոնզե մեդալակիր, այժմ` արդեն Ընդհանուր մենամարտեր սպորտաձևի UFC-ի վարկածով աշխարհի չեմպիոն անպարտելի Ռոնդա Ռոուզին ապրիլի 22-ին կժամանի Երևան:

Այս մասին համացանցի իր էջում հայտնել է Հայաստանի Բռնցքամարտի ֆեդերացիայի նախագահ Արթուր Գևորգյանը:

Վերջինիս փոխանցմամբ` այցի շրջանակներում աշխարհի ամենաուժեղ կինը կհանդիպի նաև հայ բռնցքամարտիկների հետ: Ավելին, ապրիլի 23-ին` ժամը 13:00-ին, «Դինամո» մարզադահլիճում բռնցքամարտի ՀՀ ազգային հավաքականի հետ Ռոուզին ցուցադրական մարզում կանցկացնի:

Արթուր Գևորգյանը հայտնում է, որ քանի որ Ռոուզին ԱՄՆ-ում մարզվում է Glendale Fighting Club-ում` հայազգի մարզիչ Էդմոնդ Թարվերդյանի գլխավորությամբ, ուստի` իր պարտքն է համարել հարգել Հայոց ցեղասպանության զոհերի հիշատակը և ներկա գտնվել 100-րդ տարելիցի միջոցառումներին:

Ով է Ռոնդա Ռոուզին

28-ամյա Ռոնդա Ջին Ռոուզին մարտեր առանց կանոնների սպորտաձևի վարպետ է, ձյուդոիստուհի և կինոդերասանուհի։ Ներկա պահին հանդես է գալիս «Ultimate Fighting Championship» (UFC) կազմակերպությունում՝ կրելով UFC կանանց գերթեթևքաշային կարգում աշխարհի չեմպիոնի տիտղոսը։ Անցկացրել է 11 պրոֆեսիոնալ ելույթ, բոլորն ավարտել է հաղթանակով։

 

 

Ռոուզին ծնվել է Կալիֆոռնիայի Ռիվերսայդ շրջանում ձյուդոիստուհի Աննա Մարիա դե Մարսի և Ռոն Ռոուզիի ընտանիքում։

1995 թվականին Ռոուզիի հայրը դուստրերի հետ սահնակով խաղալիս լրջորեն վնասում է մեջքը։ Տեղեկանալով, որ արյան զեղումը խանգարելու է կոտրվածքի ապաքինմանը, ինչպես նաև գիտակցելով, որ ապրելու համար քիչ ժամանակ է մնացել` Ռոն Ռոուզին որոշում է հեռանալ ընտանիքից և ինքնասպան է լինում:

11 տարեկան հասակում մայրը Ռոնդային համոզում է զբաղվել ձյուդոյով։ 1984 թվականին ձյուդոյի աշխարհի չեմպիոնուհի ճանաչված Աննա Մարիան դստերը ծանոթացնում է մարզաձևի հիմնական բաղադրիչների հետ։

15 տարեկանում Ռոուզին ընդգրկվում է Միացյալ Նահանգների ձյուդոյի հավաքականում։ Մեկ տարի անց կանանց կիսամիջինքաշային դիվիզիայի համազգային վարկանիշային աղյուսակում գրավում է 1-ին հորիզոնականը՝ դառնալով տվյալ պատվին ճանաչված ամենաերիտասարդ ձյուդոյիստուհին։ 2004 թվականին մասնակցում է Աթենքի ամառային օլմիպիական խաղերին՝ դառնալով մրցույթում մասնակցող ամենաերտիասարդ ձյուդոիստուհին։ Նույն թվականին Ռոուզին ոսկե մեդալներ է նվաճում Հունգարիայի մայրաքաղաք Բուդապեշտում անցակվող ձյուդոյի աշխարհի երիտասարդական առաջնությունում և Իսլա Մարգարիտայի պանամերիկյան խաղերում։

Ձյուդոիստուհու կարիերայից հետո Ռոուզին կարճ ժամանակ աշխատում է որպես բարմենուհի։ Ի վերջո, մարզուհին որոշում է սեփական մեքենայով մեկնել Լոս Անջելես։ 2010 թվականի օգոստոսին Ռոուզին միանում է հայազգի մարզիչ Էդմոնդ Թարվերդյանի «Glendale Fighting Club» մարզական ակումբին։ Ընդհանուր մենամարտեր սպորտաձևի սիրողական մեկնարկային մարտի ժամանակ Ռոուզին հակառակորդի վրա կիրառելով «արմբար» ձեռքի կոտրում հնարքը՝ ընդամենը 23 վայրկյանում կարողանում է հաղթանակ տանել։ Դրան հաջորդող սիրողական երկու մենամարտերն ավարտվում են նույն հնարքի կիրառմամբ՝ համապատասխանաբար, ավարտվելով 57 և 24 վայրկյանում։

Ներկա պահին Ռոուզին ունի խառնամարտի 11-0 անընդմաեջ հաղթանակների շարան։

Չեմպիոնական գոտին պաշտպանելու համար նրա վերջին մենամարտը տևեց 14 վայրկյան:

https://www.youtube.com/watch?v=Nw7Jt2bZCBU

Աշխարհի ամենաուժեղ կնոջ կինոկարիերան

Տեղեկացնենք, որ Ռոնդա Ռոուզին հայտնի է ինչպես իր փայլուն մենամարտերով, այնպես էլ` ֆիլմերում ունեցած դերակատարումներով: Այսպես, 2013 թվականի հուլիսի 23-ին կինոդերասան Սիլվեսթեր Ստալոնեն իր թվիթերյան պաշտոնական էջում հայտարարում է, որ Ռոուզին կընդգրկվի «Անկառավարելիները 3» մարտաֆիլմի դերասանական կազմում։

Օգոստոսի 9-ին Դուեյն Ջոնսոնը հաստատում է «Ֆորսաժ 7» ֆիլմում Ռոուզիի մասնակցության մասին լուրերը։ Նշենք, որ աշխարհի լավագույն կինոթատրոններում այս օրերին ցուցադրվում է «Ֆորսաժ 7» ֆիլմը: Երևանյան կինոթատրոններում ևս այն ներկայացվում է հանդիսատեսին:

Ներկայացնում ենք Ռոնդա Ռոուզիի մենամարտերի լավագույն կադրերը: