Իտալիայի Միլան քաղաքի Սկալա հրապարակում հայ համայնքի նախաձեռնությամբ բողոքի ցույց է անցկացվել ընդդեմ Արցախի և Հայաստանի նկատմամբ Ադրբեջանի և Թուրքիայի ագրեսիայի: «Արմենպրես»-ի փոխանցմամբ` հարյուրավոր մարդիկ են մասնակցել բողոքի ակցիային:
Հայ համայնքի նախաձեռնած ցույցի ընթացքում մասնակիցները պարզել են Հայաստանի դրոշներն ու «Հայաստանը խաղաղություն է ցանկանում», «Հայերն ընդդեմ միջազգային ահաբեկչության» գրությամբ պաստառներ:
«Իտալիայի հայկական ծագմամբ քաղաքացիներն այս ամենում տեսնում են թուրքական ազգային քաղաքականության շարունակությունը, որը ձևավորվել է 19-րդ դարի վերջնամասում»,- ասված է հայ համայնքի նախագահ Բայկար Սիվազլյանի ուղերձում:
Ակցիայի մասնակիցները Իտալիայի կառավարությունից խնդրել են ցույց տալ դիվանագիտական միջամտություն և օգնել խաղաղություն հաստատել տարածաշրջանում:
.gif)
