Ֆրանսիան դեմ է պաղեստինյան արմատական ՀԱՄԱՍ շարժման կողմից Գազայի հատվածի կառավարմանը ցանկացած մասնակցությանը՝ այնտեղ ռազմական գործողությունների ավարտից հետո: Այս մասին հայտարարել է Ֆրանսիայի նախագահ Էմանուել Մակրոնը՝ Շարմ էլ Շեյխ ժամանելուն պես՝ Գազայի հատվածում հրադադարի համաձայնագրի ստորագրման կապակցությամբ:
«Այսօր Գազայում ստեղծվում է հատուկ կառավարման համակարգ, և Պաղեստինի ինքնավարությունը պետք է մեծ դեր խաղա այս գործընթացում։ Ավելին, ապահովվել է Իսրայելի հետ համակարգման և թափանցիկության գործընթաց, որում ՀԱՄԱՍ-ը որևէ դեր չի կարող խաղալ», – լրագրողներին ասել է Ֆրանսիայի առաջնորդը, որի զրույցը ուղիղ եթերում հեռարձակել է Ելիսեյան պալատի մամուլի ծառայությունը։
Մակրոնը բացատրել է, որ այս կառավարման համակարգի շրջանակներում կստեղծվեն ոստիկանական և ներքին անվտանգության ուժեր՝ ՀԱՄԱՍ-ի զինաթափումն ապահովելու համար։ Այս մարմինները կաջակցվեն միջազգային ուժերի կողմից, որոնց ձևավորումը կքննարկվի մոտ ապագայում։
.gif)
