2026 թվականի ֆուտբոլի աշխարհի առաջնությունը, որն անցկացվեց ԱՄՆ-ում, Մեքսիկայում և Կանադայում, ավարտվեց Իսպանիայի հավաքականի հաղթանակով։
Իսպանիայի հավաքականի ֆուտբոլիստները տարբեր խոստումներ էին տվել իրենց հետեւորդներին Աշխարհի առաջնության գավաթը նվաճելու դեպքում։
Իսպանիայի հավաքականը եզրափակիչում լրացուցիչ ժամանակում 1։0 հաշվով հաղթեց Արգենտինայի թիմին։ Հաղթական գոլը 106-րդ րոպեին խփեց Ֆերրան Տորեսը։ Մրցաշարի մեկնարկից առաջ թիմի երիտասարդ ֆուտբոլիստներ՝ կիսապաշտպաններ Լամին Յամալը, Գավին և Պեդրին, ինչպես նաև պաշտպան Մարկ Կուկուրելյան, խոստացել էին հաղթանակի դեպքում կատարել մի շարք քայլեր։
19-ամյա Յամալն այժմ պետք է երեք շաբաթ մորուք և բեղեր աճեցնի։ Երիտասարդ ֆուտբոլիստը հետևում է նորաձևությանը, ուստի նոր կերպարը հաստատ չի համապատասխանի նրա ոճին։ 23-ամյա Պեդրին խոստացել էր մազերը ներկել շիկահեր գույնով։ Ավելի վաղ ֆուտբոլիստն արդեն ապացուցել էր, որ կատարում է իր խոստումները․ 2024 թվականի Եվրոպայի առաջնությունում հաղթելուց հետո նա արել էր խոստացած կարճ սանրվածքը և բեղեր էր աճեցրել։ Ավելի դժվար կլինի Գավիի համար․ նա խոստացել էր մազերը ներկել վարդագույն գույնով։
27-ամյա Մադրիդի «Ռեալի» պաշտպան Կուկուրելյան եզրափակիչից անմիջապես հետո հաստատել է, որ դաջվածք կանի՝ իր վրա պատկերելով Իսպանիայի հավաքականի գլխավոր մարզիչ Լուիս դե լա Ֆուենտեի դեմքը։ Ֆուտբոլիստը խոստացել էր դա անել աշխարհի առաջնությունում հաղթելու դեպքում և հաստատել է իր մտադրությունը։ Նա նաև խոստացել էր ավարտել ելույթները հավաքականում, սակայն այդ մտադրությունը դեռ չի հաստատել։
Իսպանիայի հավաքականը երկրորդ անգամ դարձավ աշխարհի չեմպիոն։ Առաջին անգամ թիմը նվաճել էր գավաթը 2010 թվականին՝ եզրափակիչում հաղթելով Նիդեռլանդներին (1։0՝ լրացուցիչ ժամանակում)։ Իսպանացիները աշխարհի առաջնությունների պատմության ընթացքում ընդամենը երկու անգամ են դուրս եկել եզրափակիչ։ Տիտղոսների քանակով Իսպանիան հավասարվել է Ֆրանսիայի և Ուրուգվայի հավաքականներին։ Նրանց առաջ են Բրազիլիան (5 տիտղոս), Գերմանիան և Իտալիան (յուրաքանչյուրը՝ 4), իսկ Արգենտինան ունի 3 աշխարհի գավաթ։ Բացի այդ, իսպանացիներն ունեն Եվրոպայի առաջնության չորս հաղթանակ։
Նանիկ Աղասյան
.gif)
