ՀՀ առողջապահության նախարար Արմեն Մուրադյանը Գեղարքունիքի մարզ կատարած աշխատանքային այցը սկսեց Վարդենիսից:
Մարզպետ Ռաֆիկ Գրիգորյանի ուղեկցությամբ նախարարը շրջեց Վարդենիսի հիվանդանոցում, ծանոթացավ կենտրոնի կարողություններին, շենքային պայմաններին, նյութատեխնիկական հագեցվածությանը եւ մասնագետներով ապահովվածությանը:
Վիրահատարանում Արմեն Մուրադյանին ներկայացվեցին իրականացվող վիրահատությունների ծավալը եւ հետվիրահատական բուժման կազմակերպումը: Հիվանդասենյակներում նախարարը զրուցեց հիվանդների հետ:
Թեեւ հիվանդանոցը ջեռուցվում է, բայց ունի շենքային պայմանների, ինչպես նաեւ նյութատեխնիկական հագեցվածության բարելավման խիստ անհրաժեշտություն:
Նշենք, որ Վարդենիսի բժշկական կենտրոնը սպասարկում է ավելի քան 47000 բնակչի: Վարդենիսում նախարարն այցելեց նաեւ կայազորային զինվորական հոսպիտալ: Նա ծանոթացավ շենքային եւ տեխնիկական պայմաններին, զրուցեց բուժում ստացող զինվորների հետ, հետաքրքվեց նրանց բուժման ընթացքով:
Արմեն Մուրադյանն ուշադրություն դարձրեց նաեւ հաստատության լաբորատոր գործիքային հագեցվածությանը: Մարտունու բժշկական կենտրոնում եւս նախարարը կարեւորեց վիրաբուժական եւ վերակենդանացման ծառայությունների պատրաստվածությունը, ծանոթացավ կադրային եւ տեխնիկական հնարավորություններին: Նա նշեց, որ հաջողության գրավականը աշխատանքի եւ ֆինանսական միջոցների ճիշտ կառավարումն է: Մասնավորապես, նախարարը հորդորեց առաջնորդվել առողջապահության նախարարության մասնագետների կողմից վերջերս մշակված աշխատավարձի ձեւավորման չափորոշիչներով:
Ի պատասխան առաջնային օղակի բժիշկների աշխատավարձի բարձրացման առթիվ շնորհակալական խոսքի` Արմեն Մուրադյանը նշեց, որ աշխատավարձերի բարձրացման խնդիրը քաղաքական կարեւոր նշանակություն ունի, եւ որն իրականություն դարձավ կառավարության կամքի եւ ջանքերի շնորհիվ:
Առողջապահության նախարարությունն էլ, ըստ Արմեն Մուրադյանի, քայլեր ձեռնարկեց, որպեսզի աշխատավարձերի բարձրացումը զգալի լինի հենց առաջին ամսում:
«Մեր նպատակը ձեր օգնությամբ բնակչությանն առողջ պահելն է, ոչ թե հրվանդ բուժելը, պետք է հասնենք նրան, որ բնակիչը տարին գոնե մեկ անգամ այցելի պոլիկլինիկա անհրաժեշտ հետազոտություններ անցնելու համար»,- ընդգծեց առողջապահության գլխավոր կազմակերպիչը: Նախարարը պատասխանեց նաեւ բուժանձնակազմին հետաքրքրող հարցերին: Այնուհետեւ Արմեն Մուրադյանն այցելեց Մարտունու ծննդատուն: Այն վերանորոգվել է 1996 թվականին իտալացի բարերարների միջոցներով: Նախարարն իր գոհունակությունը հայտնեց ծննդատան ղեկավարությանը հոգատար եւ սրտացավ վերաբերմունքի համար: Իմունականխարգելման սենյակում ծանոթացավ պատվաստանյութերի պահպանման պայմաններին, այցելեց նորածիններին:
Գեղարքունիքի մարզ աշխատանքային հանդիպումները կեզրափակվեն Գավառի բժշկական կենտրոն, Սեւանի հիվանդանոց եւ հոգեբուժարան այցերով:
.gif)
