Խաչատրյանի անվան լարային քառյակը ելույթ ունեցավ Խաչատրյանի փառատոնի շրջանակներում

ՀՀ Նախագահի հովանու ներքո անցկացվող Խաչատրյանի 4-րդ միջազգային փառատոնը ներառում է ինչպես սիմֆոնիկ, այնպես էլ կամերային համերգներ։ Հոկտեմբերի 7-ին Արամ Խաչատրյանի տուն-թանգարանում ելույթ էր ունենում Արամ Խաչատրյանի անվան լարային քառյակը (Մերի Մարգարյան (առաջին ջութակ), Հայկ Վարդանյան (երկրորդ ջութակ), Վաչե Հովեյան (ալտ), Արամ Թալալյան (թավջութակ)։ Քառյակի կատարմամբ հնչեցին Դմիտրի Շոստակովիչի և Լյուդվիգ վան Բեթհովենի ստեղծագործություններից։

Նշենք, որ խաչատրյանական փառատոնի որդեգրած սկզբունքներից է Հայաստան հրավիրել ինչպես արտասահմանցի երաժիշտների, այնպես էլ երաժշտական այս տոնի շրջանակներում ներգրավել հայաստանյան կոլեկտիվներին։
Գայանե Գևորգյանը դասական երաժշտության սիրահար է։ Արդեն մի քանի տարի պարբերաբար հաճախում է խաչատրյանական փառատոնի համերգներին։ Տիկին Գայանեն ընդգծում է, որ տարբեր ձևաչափերով և բազմազան ծրագրերով համերգները կարողանում են բավարարել տարբեր նախասիրություններ ունեցող երաժշտասերների ճաշակը։ Նա հատկապես առանձնացնում է այն փաստը, որ փառատոնն աչքի է ընկնում երիտասարդ հանդիսատեսով։ Ըստ նրա՝ ուրախալի է, որ երիտասարդները հաճախում են դասական երաժշտության համերգների։ Ընդ որում, ըստ տիկին Գայանեի, շատ մեծ է Խաչատրյանի փառատոնի դերը երիտասարդների շրջանում դասական երաժշտությունը տարածելու հարցում։

Խաչատրյանի միջազգային փառատոնը կյանքի են կոչում Հայաստանի պետական երիտասարդական նվագախումբը (գլխավոր գործընկեր՝ ՎիվաՍելլ-ՄՏՍ) և «Դասական երաժշտության աջակցություն» ՀԿ-ն՝ ՀՀ մշակույթի նախարարության, «Խաչատրյան» և Մշակույթի աջակցության եվրոպական հիմնադրամների աջակցությամբ։
Խաչատրյանի 4-րդ միջազգային փառատոնի հովանավորներն են «Ջերմուկ գրուպ» ընկերությունը, «Անի պլազան», «Երևանի կոնյակի գործարանը», ԱրմՍվիսԲանկը։
Փառատոնի մասին տեղեկություններ կարող եք գտնել khachaturianfestival.com կայքում։