Հունիսի 18-ին ՀՀ Արագածոտնի մարզի Սաղմոսավան գյուղում տեղի է ունենալու համայնքի ղեկավարի ընտրություն: Գյուղապետի պաշտոնի համար առաջադրված թեկնածուները երեքն են` ՀՀԿ-ական Գեւորգ Ավագյանը, անկուսակցական Պատվական Թադեւոսյանը եւ դաշնակցական Գյուտ Ղազարյանը:
«Ժողովուրդ»-ը տեղեկացավ, որ Սաղմոսավանի գյուղապետի ընտրությունները արտահերթ են, քանի որ անցած տարվա սեպտեմբերին այս պաշտոնին վերընտրվել էր Ներսես Ավագյանը, ով որոշ ժամանակ անց հանկարծամահ է եղել: Ի դեպ, առաջադրված թեկնածուների թվում է նաեւ նրա որդին` Գեւորգ Ավագյանը: Առաջիկա ընտրությունների շուրջ «Ժողովուրդ» օրաթերթը զրուցել է նրա հետ:
-Պարո՛ն Ավագյան, համոզո՞ւմ եք բնակիչներին, որ Ձեզ ընտրեն:
-Համոզելու ընդհանրապես բան չկա: Բնակիչներն իրենք կորոշեն, ում արժանի կգտնեն, նրան էլ կընտրեն:
-Տնտետուն ե՞ք մտնում, համագյուղացիների հետ ե՞ք հանդիպում…
-Ես տնետուն մտնելու կարիք էլ չունեմ: Քանի որ իմ հայրը դեռեւս 1999 թվականից գյուղի համար գործեր է արել: Գյուղի մի փոքր երեխուց բռնած մինչեւ մեծը անգիր գիտի, թե մենք ով ենք:
-Ձեր մրցակիցներից մեկը դաշնակցական է, ինչպե՞ս եք պատկերացնում Ձեր պայքարը նրա հետ:
-Շատ լավ ենք իրար ճանաչում: Գյուղը փոքր է, բոլորս իրար գիտենք:
-Լարվա՞ծ են հարաբերությունները…
-Մենք մեր կողմից ոչ մեկի հանդեպ թշնամանք չունենք:
-Մտադի՞ր եք շարունակել Ձեր հոր գործունեություն:
-Այո՛, ծրագրեր ունեմ: Դրանք հորս ծրագրերն են, որոնք նա կիսատ է թողել. չհասցրեց իրականացնել հիվանդանոց ընկնելու պատճառով: Հիմնականում ճանապարհների փոսալցման աշխատանքներն էր, որոնք չհասցրեց կատարել: Ես եմ հիմա դրանք անում, կարիք չկա՝ գյուղապետ դառնամ: Ես արդեն սկսել եմ փոսալցումները:
-Ո՞ւմ միջոցներով եք իրականացնում փոսալցման աշխատանքները:
-Իհարկե, իմ միջոցներով: Ես գյուղապետարանի միջոցների հետ ինչ գործ ունեմ:
-Արդյո՞ք նախընտրական շրջանում թույլատրվում է նման ծառայություններ իրականացնել:
-Ասֆալտ չեմ անում, որ գյուղացիներին որպես կաշառք տամ: Դա ուղղակի իմ հոր ցանկությունն էր, որը չհասցրեց իրագործել: Ես դա անում եմ իմ հոր խղճի հանգստության համար:
Զրուցեց ՍՅՈՒՆԷ ՀԱՄԲԱՐՁՈՒՄՅԱՆԸ
.gif)
