«Հո ես միամիտ չեմ, որ ասեմ՝ դա «Սորոսն» է արել». ԵՊՀ ռեկտոր Արամ Սիմոնյանը ներողություն չի խնդրի. «Ժողովուրդ»

«Ժողովուրդ» օրաթերթը գրում է․ «ԵՊՀ ռեկտոր Արամ Սիմոնյանն օրերս ակնարկել էր, թե Զինապարտության մասին օրենքի փոփոխություններով տարկետման իրավունքի սահմանափակումների դեմ պայքարող ուսանողների բողոքի ալիքն ուղղորդվում է «Սորոսի» հիմնադրամից, իսկ որպես խոսքերի ապացույց, նա նշել էր, թե «Հանուն գիտության զարգացման» նախաձեռնության անդամ Դավիթ Պետրոսյանը «Սորոսի» հիմնադրամի աջակցությամբ եղել է Լեհաստանում «եւ գուցե հանձնարարություն է ստացել դրսից»:

Այս հայտարարությունից հետո ուսանողները ռեկտորից պահանջում էին կա՛մ ապացույցներ ներկայացնել, կա՛մ ներողություն խնդրել: Սակայն Սիմոնյանը «Ժողովուրդ» օրաթերթի հետ զրույցում ասել է, թե ինքը ներողություն չի խնդրի: «Ես ասել եմ ՝«Սորոսի» կազմակերպած հանդիպմանն են գնացել: Ոչ մի ներողություն էլ խնդրելու ես անհրաժեշտություն չունեմ: Նորից եմ ասում, որ դա իմ անձնական կարծիքն է, որ նրանք ուղղորդվում են: Իսկ «Սորոսի» հետ դա որեւէ կապ չունի, հո ես միամիտ չեմ, որ ասեմ՝ դա «Սորոսն» է արել, ես որեւէ ապացույց չունեմ»,- նշեց նա` հավելելով, թե ուղղորդել ասելով նկատի չի ունեցել հենց «Սորոսի» կողմից: Ասել է թե՝ նահանջ երգով»:

Մանրամասները՝ «Ժողովուրդ» օրաթերթի այսօրվա համարում։