Վեոլիան Լեռնապատում

Վեոլիա Ջուրը շարունակում է բաժանորդների հետ ջրամատակարարման և ջրահեռացման ծառայությունների մատուցման պայմանագրերի կնքման գործընթացը: Անցած տարի այս ուղղությամբ զգալի աշխատանք է կատարվել: Կան համայնքներ, որտեղ գործն ավարտին է մոտենում: Սակայն անելու բան էլ դեռ շատ կա, ինչը բնական պետք է համարել, եթե հաշվի առնենք, որ խոսքը մոտ 550
000 ակտիվ բաժանորդների մասին է, կամ հանրապետության բնակչության 73 տոկոսի: Բայց եւ հապաղել չի կարելի. պայմանագիրն այն իրավական հիմքն է, որի վրա կառուցվում են ժամանակին հարիր հարաբերություններ ջրամատակարարի ու բաժանորդի միջեւ: Ահա եւ շտապում են ընկերության առեւտրային ծառայությունները լրացնել առկա բացը: Այդ թվում Մարզերի առեւտրային տնօրինության «Լոռի» կոմերցիոն տեղամասը:

Վերջինիս սպասարկման տարածքում անցած տարվանից դեռևս մնացել են գյուղական համայքներ, որտեղ տարբեր պատճառներով այս աշխատանքներն ամբողջությամբ չեն ավարտվել: Պայմանագրերի կնքման ժամանակաշրջանը նախ կարճ էր և հետո՝ գյուղաբնակների բազմազբաղ առօրյան բարդացրել էր տեղամասի տեսուչների՝ աշխատանքն այս ուղղությամբ: Ահա թե ինչու Վեոլիա Ջուր ՓԲԸ-ն երկարացրել է պայմանագրերի կնքման ժամկետը` հնարավորություն տալով սպառողներին հստակեցնել իրավահարաբերությունները ընկերության հետ եւ օրինականացնել մատուցվող ծառայություններից օգտվելը:

Խնդրի լուծման նպատակով «Լոռի» կոմերցիոն տեղամասի ներկայացուցիչներն օրերս Լոռու մարզի Լեռնապատ համայնքում էին: Համայնքապետարան-ընկերություն համագործակցության շնորհիվ այստեղ կարճ ժամանակամիջոցում կնքվեց ավելի քան 100 պայմանագիր: Նաեւ բաժանորդներին պարզաբանվեց դրա կարեւորությունն ու պայմանագրից բխող կողմերի իրավասություններն ու
պարտականությունները:

«Լոռի» տեղամասն այս ուղղությամբ կաշխատի մյուս գյուղերում եւս: Ընկերության մասնագետները Վեոլիա Ջրի բոլոր սպասարկման կենտրոններում, տարածքային գրասենյակներում կընդունեն բաժանորդներին, բայց եթե դժվարություն կամ հարկ լինի, նրանք, ինչպես Լեռնապատում, անձամբ կայցելեն գյուղեր և տեղում կկնքեն պայմանագրեր՝ նախապես այդ մասին տեղյակ պահելով համայնքապետարաններին: Անձնագիր և սեփականության վկայական կամ համայնքապետարանից տվյալ տարածքի նկատմամբ իրավունքը հաստատելու մասին տեղեկանք ներկայացնելով՝ Վեոլիայի հետ պայմանագիրը կկնքվի հաշված րոպեների ընթացքում: Այսպիսով, նվազագույնի կհասցվի բաժանորդներին հասցվող անհարմարությունը՝ միաժամանակ մինչեւ 2031 թվականը երաշխավորելով
քաղաքակիրթ հարաբերություններ ջրամատակարարի հետ: Մի խոսքով, շահավետ է: Եւ պարտադիր: