Նիդերլանդների Ուտրեխտ քաղաքի դատարանի որոշմամբ՝ երկու հայ երեխաներ Լիլին (11 տարեկան) և Հովիկը (12 տարեկան) կարող են արտաքսվել իրենց մոր հայրենիք՝ Հայաստան: Ինչպես հաղորդում է «Արմենպրես»-ը, այս մասին հայտնում է Dutch News-ը:
Երեխաներին և նրանց մորը՝ Արմինա Համբարձումյանին արտաքսելու մասին որոշումը կայացվել էր դեռևս 2017 թվականին: Օգոստոսին նրանց մայրը Հայաստան ուղարկվելուց առաջ երեխաներին ուղարկել էր անհայտ մի վայր:
Նրանք գտնվել էին մեկ շաբաթ անց և պահվում էին փախստական երեխաների խնամքով զբաղվող անկախ կենտրոնի կողմից:
Ուտրեխտի դատարանը բավարարել է արդարադատության նախկին նախարար Կլաաս Դիյկոֆի որոշումը՝ երեխաներին չշնորհելու բնակության թույլտվություն «ժամանակավոր մարդասիրական հիմքերի» վրա:
Նշվում է, որ երեխաները ծնվել են Ռուսաստանում և շուրջ 9 տարի բնակվել են Նիդերլանդներում, նրանք երբեք չեն ապրել Հայաստանում ու անգամ չգիտեն հայերեն: Այդուհանդերձ, նրանք չեն ստացել կառավարության կողմից փախստականներին տրվող համաներումը: Երեխաների պաշտպանության Raad voor de Kinderbescherming խորհրդից հայտնել են, որ ակնկալվում է, որ երեխաների մայրն ի վիճակի կլինի խնամել նրանց:
.gif)
