Քիչ առաջ Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում դատավոր Լևոն Ավետիսյանի նախագահությամբ կայացավ Արաբկիր ԲՀ մանկաբույժներ Լիլիթ Վարդանյանի և Զարինե Այվազյանի գործով դատական նիստը:
Հիշեցնենք, որ ամբաստանյալներին մեղադրանք էր առաջադրվել այն բանի համար, որ նրանք, հանդիսանալով բժշկական օգնություն և սպասարկում իրականացնող անձինք, Արաբկիր ԲՀ-ի բոքսային բաժանմունքի մանկաբույժ, 2013 թվականի դեկտեմբերի 31-ին ոչ պատշաճ են կատարել մասնագիտական պարտականությունները ՝ դրանց նկատմամբ անփույթ վերաբերմունքի հետևանքով անզգուշությամբ առաջացրել են բուժվող հիվանդի ` երկուսուկեսամյա Լիա Միսակյանի մահը։
Այն բանից հետո, երբ դատախազ Դավիթ Կարապետյանը ներկայացրեց մեղադրական եզրակացությունը, ամբաստանյալ Այվազյանը հայտարարեց, որ չի հասկանում ` իրեն ինչում են մեղադրում և որն է իր մեղքը: Նույնը հաստատեց Այվազյանի պաշտպանը ՝ Երեմ Սարգսյանը: Վերջինս պատճառաբանեց, որ մեղադրականում ասվում է, որ համապատասխան ախտորոշման ու բուժման եզրակացությունը չի վերցվել, որպեսզի իրականացվեր համապատասխան բուժում, իրենց համար անհասկանալի է համապատասխան ախտորոշում արտահայտությունը, փաստաբանի խոսքերով ` պետք է հստակ նշվի` ինչ ախտորոշման մասին է խոսքը:
Տուժողի իրավահաջորդի ներկայացուցիչ Միսակյանը ՝ մահացածի հայրը,նշեց, որ դեպքը տեղի է ունեցել մանկաբույժների ` իրենց աշխատանքը վատ կատարելու պատճառով:
Դատը հետաձգվեց կողմերի ՝ դատը հետաձգելու համար ներկայացված միջնորդությունների պատճառով:
.gif)
