ԵԱՀԿ Մինսկի խմբի համանախագահները՝ Իգոր Պոպովը (Ռուսաստան), Ջեյմս Ուորլիքը (ԱՄՆ) և Պիեռ Անդրիոն (Ֆրանսիա), Նյու Յորքում Հայաստանի արտգործնախարար Էդվարդ Նալբանդյանի և Ադրբեջանի արտգործնախարար Էլմար Մամեդյարովի հետ հանդիպման ընթացքում քննարկել են Փարիզում հոկտեմբերի վերջին նախատեսվող նախագահների հանդիպման նախապատրաստությունները: Այդ մասին ասված է ԵԱՀԿ մամուլի հաղորդագրության մեջ:
Հանդիպմանը Հայաստանի և Ադրբեջանի նախագահները պատրաստվում են շարունակել երկխոսությունը Լեռնային Ղարաբաղի հակամարտության կարգավորման գլխավոր բաղադրիչների շուրջ: Համանախագահները հույս են հայտնել, որ նախագահները կունենան արդյունավետ քննարկումներ տևական կարգավորման ուղղությամբ առաջընթաց գրանցելու համար:
Հանդիպմանը ներկա գտնվող ԵԱՀԿ գործող նախագահի անձնական ներկայացուցիչ Անջեյ Կասպշիկը հակիրճ տեղեկացրել է մասնակիցներին հարցերի մասին, որոնք կարող են ներառվել գալիք հանդիպման օրակարգում: Համանախագահները մտադրություն են հայտնել մոտ ժամանակներս այցելել տարածաշրջան:
Համանախագահները նաև հանդիպել են ԵԱՀԿ նախագահ Դիդյե Բուրկհալտերի հետ՝ քննարկելու Լեռնային Ղարաբաղի հակամարտության խաղաղ կարգավորման գործընթացում գրանցված վերջին զարգացումները: Նրանք ԵԱՀԿ նախագահին են ներկայացրել Սոչիում և Ուելսում նախագահների վերջին հանդիպումների մասին հաշվետվություն և տեղեկացրել են նրան Փարիզում հանդիպման համար պատրաստությունների մասին:
.gif)
