Հայոց ցեղասպանության վերաբերյալ բանաձևը Բունդեսթագում հետ է կանչվել լրացուցիչ մշակման

Գերմանիայի Բունդեսթագը փետրվարի 25-­ին քննարկել է Հայոց ցեղասպանության բանաձևի ընդունման հարցը, որը ներկայացվել էր «Դաշինք 90/Կանաչներ» կուսակցության կողմից։ Ինչպես հայտնում է Հայաստանի հանրային ռադիոն, բանաձևի վերաբերյալ քվեարկություն չի կայացել. որոշվել է հարցը լրացուցիչ քննարկել և քվեարկել մինչև ապրիլի 24­-ը:

«Դաշինք 90/Կանաչներ» կուսակցության համանախագահ Ջեմ Օզդեմիրը համաձայնել է հետ կանչել ներկայացված բանաձևը: Իշխող Քրիստոնեա­դեմոկրատական միություն/Քրիստոնեա­սոցիալական միություն կոալիցիայի պատգամավոր Շտեֆան Կաուֆմանն այս կապակցությամբ Թվիթերի իր էջում նշել է, որ Կանաչների կուսակցությունը համաձայնել է հետ վերցնել բանաձևը լրացուցիչ մշակման համար:

«Դաշինք 90/Կանաչներ» կուսակցությունը և դրա համանախագահը նախկինում բազմիցս դատապարտել են Հայոց ցեղասպանությունը՝ հորդորելով Թուրքիային ընդունել պատմական իրողությունն ու առերեսվել կատարվածին:

Գերմանիայի խորհրդարանը 2005 թվականին ընդունել է Հայոց ցեղասպանությունը ճանաչելու մասին որոշում: Բունդեսթագի որոշման մեջ, սակայն, չի օգտագործվել Հայոց ցեղասպանություն եզրը, այլ նշվել է «հայերի կոտորածներ»: 2015 թվականի մարտին Գերմանիայի խորհրդարանի նախագահ Նորբերթ Լամերտը հայտարարել էր, որ «Օսմանյան կայսրությունում առաջին համաշխարհային պատերազմի
ժամանակ՝ ողջ աշխարհի աչքի առաջ տեղի ուենցածը ցեղասպանություն էր: Եվ դա 20­րդ դարի վերջին ցեղասպանությունը չէր»:

Ապրիլի 24-­ին Բունդեսթագում լսումներին ընդառաջ Գերմանիայի արտաքին գործերի նախարար Ֆրանկ­Վալտեր Շտայնմայերը հայտարարել էր, որ ինքն այն պատգամավորների կողքին է, ովքեր կողմ են հայերի զանգվածային սպանությունները «ցեղասպանություն» անվանելուն: Գերմանիայի նախագահ Յոախիմ Գաուկն ապրիլի 23­ին Բեռլինի Մայր տաճարում Հայոց ցեղասպանության հիշատակին նվիրված
արարողության ժամանակ իր ելույթում օգտագործել էր «ցեղասպանություն» եզրույթը: